شانەگە لە بەیاننامەیگ رەسیە ئاژانس شەفەق نیوز وت: دویای رەسین زانیاری هەواڵگری وە بازرگانیگ هوشبەری لە ناوچەی کەرادە، مەفرەزەیل وەڕیەوبەرایەتی هەواڵگری و ئاسایش بەغداد توەنستن توومەتبارگە وە تاوان دەسگیر بکەن، لەو مەوقە ک مادەی کریستال نەێدە ناو کیسەی بویچگ و بەشیانەو کەێد.
بەیاننامەگە وتیش: توومەتبارگە دویای وەرگردن مووڵەت دادوەری دەسگیر کریا و دریا دەس لایەنەیل پەیوەندیدار.
لەلاییگتر، شانەگە دیاری کرد ک مەفرەزەیل هەواڵگری و ئاسایش بەغداد یەکیگ لە داواکریایل وە مادەی (١/٤) تیرۆر مەوقەی رەدبوین لە خاڵ ئەبو غرێب دەسگیر کردن.
شانەگە دیاری کرد ک لەناو کار وەردەوام لە وەشوینکەفتن داواکریایل، مەفرەزەیل وەڕیەوبەرایەتیەگە هەمیش توەنستن توومەتباریگ وە مادەی ٤٤٦ لە یاسای سزادان عراقی لە ناوچەی جادریە دەسگیر بکەن.
بەیاننامەگە وتیش: مەفرەزەیل وەڕیەوبەرایەتی هەواڵگری و ئاسایش دیوانیە وەهاوکاری دژە هوشبەری، توەنستن ٤ بازرگان وە تاوان و دەسگیر بکەن، ک بڕیگ لە مادەی کریستال و چشتەیل وەکارهاوردنی وەپیان گردن، و ریکارەیل یاسایی وەگەردیان جیوەجی کریا.
وەزارەت ناوخۆ، لە بەیاننامەیگ رەسیە ئاژانس شەفەق نیوز وت: دویای رەسین زانیاری لە مرافەیگ و تەقەکردن لە ناوچەی فزێلیە خوەرهەڵات بەغداد پایتەخت، تیمیگ ئەمنی لە لیوای دویەم فیرقەی یەکەم پولیس فیدڕاڵی وەگەرد مەفرەزەیل هەواڵگری لیواگە دروس کریا، و پەنج کەس وە توومەت کوشتن لەو ناوچە دەسگیر کردن، ک لەناو ماشینیگ کیای بارهەڵگر بوینە و شەش تفەنگ و مەخزەن کلاشینکۆف و ١٠ کولە و ٢ چەقوو و قەڵغانیگ وەپیان بویە.
بەیاننامەگە وتیش: توومەتبارەیل و چشتەیل تاوانییان دریانە دەس لایەنەیل پەیوەندیدار.
لەلای خوەییش، فەرماندەیی پولیس پارێزگای واست لە بەیاننامەیگ رەسیە ئاژانس شەفەق نیوز وت: دویای رەسین زانیاری لەبان دوکانیگ دڵنگ فرووش، چەک و گولەی بیمووڵەت فرووشێد، و دویای وەرگردن مووڵەت یاسایی، لیوا روکن محمد قاسم فەهەد فەرماندەی پولیس واست فەرمان وە جیوەجیکردن ئەرکەگە دا.
بەیاننامەگە وتیش: وەکوتپڕ هیزەیگ ئەمنی هاوبەش کەفتە جویلە، و دویای رەسینی ئەرا شوینەگە و وەشکین دوکانەگە، ٩ گولەی BKC و ١٢٠ گولەی ئێم سکستین و ١٦٥ گولەی M4 و ٣ دەوانچە ٩ ملیم و ٦ دەوانچەی دەنگی و ٢٤ گورمیچە ئاسن و ٣٩ پشت تیژ لەناوی گریا، و توومەتبارەیل دەسگیر کریان و دریانە دەس بنکەی پەیوەندیدار.