شەفەق نیوز/ ئەنجومەن دادگای باڵا، ئمڕوو سێشەممە، راگەیان زیاتر لە 19 هەزار زیندانی لە چوارچمگ "وەخشین گشتی" ئازادکریانە، دووپاتکرد عراق بڕە پویل فرەیگ وەرگردیە.

دادگا لە بەیاننامەیگ رەسیە ئاژانس شەفەق نیوز راگەیان، "سەرۆک ئەنجومەنەگە فائق زەیدان، ئمڕوو سێشەممە، کووبونەوەیگ ئەنجامدا، کە نوێنەرەیل سەرۆک دادگای فیدراڵی گردبویەخوەی، وەئامادەبوین سەرۆک داواکاری گشتی و سەرۆک دەسەی چەودێریی دادوەری، لە  گردەوبوینەگە، ئەنجام جیوەجیکردن یاسای هەموارکردن یاسای وەخشین شمارە (27) ساڵ 2016  باس لەلیکریا".

وەپای بەیانامەگە، زیدان  داواکردیە "کووبونەوەیگ فراوان ئەنجام بدەێد ئەرا لیژنەیل تایبەتمەن لە جیوەجیکردن  یاساگە و چارەسەرکردن ئەو گرفتەیل سەرهەڵدەن، هەمیش ئامادەبون وەپیاچگن ئەرا راپۆرت سەرۆک دەسەی چەودێری دادوەری کردن لەباوەت وە ئەنجامدان  جیوەجیکردن یاساگە لە ٢١ی ١ی ٢٠٢٥ تا ٣٠ی نیسانی ٢٠٢٥، کە دەرکەفت شمارەی ئەو کەسەیلە وەپای یاساگ ئازادکریانە  کە لەناوەندەیل دەسوەسەر و زیندانیکریابوین  لە سەرچەم پارێزگایەیل  (١٩٣٨١) کەسە".

دیاریکرد، " وە گشتی ئەو کەسەیلە گردیەسەخوەی کە وە غیابی سزادریانە، توومەتبار وە کەفالەتن یا ئەوانەگ فەرمان دەسگیرکردن یا بانگکردن ئەرایان دەرچگە،وشمارەیان (٩٣٥٩٧) نەوەد و سێ هەزار و پەنج سەد و نەوەد و هەفت کەس بویە".

دیاریکرد، بڕ  "(11,941,456,992) ملیار دینار عراقی، و (624,959) دۆلار ئەمریکی و (770,000,000) ریاڵ سعودی وەرگیریاس".