شەفەق نیوز - دیالی / سەلاحەدین

پارێزگایەیل دیالە و سەلاحەدین، ئمڕوو یەکشەممە،  سێ رویداو وەخوەیاندین  ناوەین پەیاکردن کوورپەیگ ساوای شیرخوەر لە یەکیگ لە جادەیل، و دەسگیرکردن توومەتباریگ وە دزیکردن وایەر کارەبا، و لەناوبردن ۲۱۲ کیلوگرام لە گوشت و کەرەسەی خوەراکی و بەسانن دووکانەیل سەرپێچیکەر.

 لە دیالە، سەرچەوەیگ ئەمنی ئەرا ئاژانس شەفەق نیوز راگەیان  چەن ماسیگریگ کوورپەیگ شیرخوەر پەیا کردن کە خریابوی لە دەوروگەر میقدادیە، لە نزیک ناوچەی ئەلهارونیە لە وەخت چگنیان ئەرا ماسیگری.

دیاریکرد،  ماسیگرەیل دەسوەی قورتاریکردن و دانێ دەس دەزگا ئەمنییەیل تایبەتمەن ئەرا گردنەوەر رێکارەیل پوڕیاگ لە چاودێریکردنی.

لە سەڵاحەدین فەرماندەیی پۆلیس پارێزگاگە، ئمڕوو یەکشەممە، دەستگیرکردن توومەتباریگ وە دزیکردن وایەر کارەبا لە مالیگ کە ها ژیر دروستکردن لە شار تکریت راگەیان، وەگەرد کە سزندێ و مسەگەی ناوی درارێد وە مەبەست فروشتن.

 فەرماندەیی لە بەیاننامەیگ  ئەرا ئاژانس شەفەق نیوز هات ئاشکرا کرد  توومەتبار (ح. ن. ن.) دان نا وە ئەنجامدان تاوانەگە، لە وەختیگ دادوەر لێکۆڵینەوە بڕیار دا وە دەسوەسەرکردنی وەپای سزای مادەی 446 لە یاسای سزایەیل.

 لە سەلاحەدینیش، خەستەخانەی ڤێتێرنەری لە پارێزگاگە، ئمڕوو یەکشەممە، لەناوبردن ۲۱۲ کیلوگرام لە گوشت و کەرەسەی خوەراکی نەپوڕیاگ ئەرا وەکارهاوردن ئادەمیزاد راگەیان، بیجگە لە بەسانن شمارەیگ لە دووکانەیل سەرپێچیکەر، لە چوارچمگ هەڵمەتیگ چەودێری کە تیپەیل تایبەتمەن لە قەزای بێجی جیوەجی کرد.

وەڕێوەبەر نەخۆشخانەگە، ئیحسان خالید ئەلبەزونی، لە بەیاننامەیگ  ئەرا ئاژانس شەفەق نیوز هات وت، هەڵمەتەگە بەشداربوی لە وەدویاچگن نرخەیل گوشت لە بازاڕەیل و کارکردن ئەرا کەمکردن بەرزەوبوینی، وەگەرد گردنەوەر رێکارەیل یاسایی دژ وە سەرپێچیکەرەیل.