شەفەق نیوز- دیالە
شەفەق ئمڕوو سێشەممە، تەرم گەنجیگ کوشیاگ وە گولە لە نزیک ری بەلەدروز - بەعقوبە، لە خوەرهەڵات پارێزگای دیالە پەیا کریا، لە وەختیگ فەرماندەیی پۆلیس پارێزگاگە دووپات کرد لەبان دەسگیرکردن بکوشەگە دۊای کەمتر لە سێ سەعات لە رۊداین تاوانەگە، وەدۊای تەقەلایگ ئەمنی و هەواڵگری خەسیگ.
سەرچەوەیگ ئەمنی ئەرا ئاژانس شەفەق نیوز وت، کە رۊداوەگە دۊای نیمەشەو رۊ دایە، و زانیارییە سەرەتاییەیل دەسنشان کەن ئەرا ئەوەگ رۊداوەگە تاوانکارییە.
وتیش کە دەزگایەیل ئەمنی شمارەیگ لە گومانلیکریاگەیل دەسگیر کردنە، لە وەختیگ دەس کردنەسە لێکۆڵینەوەیل ئەرا زانستن چۊنیەتی تاوانەگە و دیاریکردن ناسنامەی ئەونگ دەس لەتی دیرێد.
سەرچەوەگە وتیش دا گەنجەگە لە خەڵک ناوچەی "ندا"س، و دیاری کرد کە دەزگایەیل ئەمنی ماشینەگەی لە وەختیگ دۊاتر لە دەورگرد قەزای بەلەدروز پەیا کردنە.
دۊای رۊداوەگە، کەسوکار گەنجەگە و خەڵک ناوچەگە دۊای نیمەشەو گردەوبوینیگ ناڕەزایەتی رێک خستن، و داوا کردن وە ئاشکراکردن تاوانبارەیل و پیشکەشکردنیان وە دادپەروەری و سزادانیان وەپەی یاسا.
لەی چوارچیوە، فەرماندەی پۆلیس دیالە لیوا روکن یاسایی محمد کازم عەتیە، ئمڕوو سێشەممە، خەوەردا لە دەسگیرکردن تومەتباریگ کە یەکیگ لە هاووڵاتییەیل لە ناوچەی ندا کوشتیە، دۊای کەمتر لە سێ سەعات لە رۊداین تاوانەگە، وەدۊای تەقەلایگ ئەمنی و هەواڵگری خەسیگ کە بۊە مدوو ئاشکراکردن چۊنیەتی رۊداوەگە و دیاریکردن ناسنامەی تاوانبارەگە و دەسگیرکردنی.
وتیش کە تاوانبارەگە قوربانییەگە کیشاسە ماڵ خوەی، وەرجە کوشتنی، دۊاتر تەرمەگە و ماشینەگە ئەرا ناوچەیگ چووڵ بردیە لە پشت سەربازگەی کەرکووش لە باشوور قەزای بەلەدروز، لە تەقلایگ ئەرا سڕپووکردن تاوانەگە و دۊرخستنی لەو شوینەیلە کە کامێرای چەودیاریکردن لەتیان هەس.
وتیش کە تومەتبارەگە ماشینەگە دۊاتر ئەرا ناوچەی حەولی بەلەدروز بردیە، لە تەقلایگ ئەرا دۊرخستن گومانەیل لە شوین جیوەجیکردن تاوانەگە.
دیاری کرد کە ئۆپەراسیۆن ئاشکراکردن تاوانەگە لە ئەنجام هاوکاری و هەماهەنگی لە ناوەین دەزگایەیل ئەمنی هات، و لە نوایان دەزگای ئاسایش نیشتمانی لە دیالە، و بەش پۆلیس بەلەدروز، و بەش نەهیشتن تاوان دیالە، و وەڕێوەبەرایەتی هەواڵگری و نەهیشتن تیرۆر دیالە، و بەش پۆلیس مەندەلی، و دیاری کرد کە تیمەیل ئەمنی وە شیوەیگ هاوبەش کار کردنە لەبان گردەوکردن زانیارییەیل و شیەوکردن بەڵگەیل و وەدۊایچگن گشت بندروس رۊداوەگە، تا رەسین ئەرا دیاریکردن ناسنامەی تاوانبارەگە و شوین بۊینی.
وتیش قۊلەوبۊن لە لێکۆڵینەوە و وەدۊایچگن هونەری و مەیدانی بەشداری کردنە لە دەسگیرکردن تومەتبارەگە ماوەی وەختیگ پەیمانەیی، و دیاری کرد کە لە سەرەتاوە دان وە جیوەجیکردن تاوانەگە نایە، لە وەختیگ دیاری کرد کە مدوو کارەگەی گلەو خوەێد ئەرا بۊین قەرزەیل دارایی لە ناوەینی خوەی و قوربانییەگە کە وە 70 مەلیۆن دینار عراقی مەزەنە کریەێد.