شەفەق نیوز- بەغداد

سەرۆک فراکسیۆن ئاوەدانکردن و گەشەپیداین پەرلەمانی، بەها ئەعرەجی، ئمڕوو یەکشەممە، دووپات کرد کە هیزەیل ئەمریکی لە عراق مینن ئەرا پاراستن باڵیۆزخانەی ئەمریکی و دەسەیل دیپلۆماسی و بەرژەوەنیەیل ئەمریکی،  وتیش یە جیاوازە لە بۊین هاوپەیمانی ناودەوڵەتی.

ئەعرەجی، ئەرا ئاژانس شەفەق نیوز وت، کە عراق رێککەفتیە وەرد وڵاتە یەکگرتگەیل لەبان ئەوەگ 30 ئەیلول/ سێپتەمبەر بوودە وەخت کیشیان هیزەیل هاوپەیمان ناودەوڵەتی، وەلی بڕیگ جیاوازی نییەکەن لە ناوەین بۊین هاوپەیمان ناودەوڵەتی وە سەرکردایەتی وڵاتە یەکگرتگەیل و کیشیانەوی، و لە ناوەین بۊین ئەمریکی کە تەرخان کریاس ئەرا پاراستن باڵیۆزخانە و دەسەیل دیپلۆماسی و بەرژەوەنیەیل ئەمریکی.

دیاری کرد کە جیاوازییگ هەس لە ناوەین بۊین هاوپەیمان ناودەوڵەتی وە سەرکردایەتی ئەمریکییەیل و کیشیانیان، و لە ناوەین بۊین ئەمریکی ئەرا پاراستن دەسەیل دیپلۆماسی لە عراق.

 لەباوەت دۆسیەی چەک، ئەعرەجی دووپات کرد کە "بڕیار رێکخستن چەک بڕیاریگ عراقییە"، وە دووپاتکردن لەبان ئەوەگ "نیەکرێد لە یەک رووژ جیوەجی بکریەێد"، بەڵکم هەوەجە وە ماوەیگ و گفتوگۆ وەرد باڵەیل چەکدار دیرێد.

 لە وەختیگ وەرجەتر لە ئمڕوو، شیەوکەر لە پەیمانگای واشنتۆن و وەرپرس وەرین لە ئەنجومەن ئاسایش نەتەوەیی ئەمریکی، ئەندرۆ تابلەر، ئەرا ئاژانس شەفەق نیوز دووپات کردۊد، کە بڕیگ لە هیزەیل ئەمریکی دۊای 30 ئەیلول ئیسە مینن، ئەرا پاراستن باڵیۆزخانە لە بەغداد، و کونسوڵگەری لە شار هەولێر پایتەخت هەرێم کوردستان.

 رووژ 30 ئەیلول/ سێپتەمبەر 2026، وەخت کووتاییهاوردن وە بۊین سەربازی هاوپەیمان ناودەوڵەتییە لە عراق، کە یەیش ئەوەسە کە بڕیگ لە باڵەیل چۊ بنەمایگ وەکاری تیەرن ئەرا بەسیان ئاییندەی چەکەیلیان وە کیشیان هیزە بیگانەیلە.

 دۆسیەی باڵەیل چەکدار لە ناسکترین دۆسیەیلە لە وەرانوەر حکومەت عراقی، وەرد نزیکەوبۊن مەوقەی 30 ئەیلول/ سێپتەمبەر کە هیزە سیاسییە سەرەکییەیل  دیاریی کردنە ئەرا گیرهاوردن چەک لە دەس دامەزراوە فەرمییەیل، وەرجە ئەوەگ وەدویا بچن بکەن و دووپات بکەن کە هیچ وەختیگ دیاریکریاگ ئەرا گیرهاوردن چەک نییە، وەپەی قسەی راوێژکار ئەمنی، قاسم ئەعرەجی.