شه‌فه‌ق نيوز/ وه‌لاى كه‌مه‌و چوار خوه‌ينيشانده‌ر كوشيان و شماره‌يگيش زه‌خمدار بوين وه‌ده‌س هيزه‌يل ئه‌منى له شار ناسريه‌ى پايته‌خت ناوچه‌يى پاريزگاى زيقار له باشوور عراق.
ده‌مه‌و شه‌وه‌كى ئمڕوو هيزه‌يل ئه‌منى روێ وه‌ڕوێ خوه‌ينشانده‌ره‌يل بوينه‌و له نزيك پيه‌ڵ زه‌يتون و ته‌قه له خوه‌ينيشانده‌ره‌يل كردن و نزيكه‌ى چوار كه‌س كوشيان و شماره‌يگيش زه‌خمدار له‌لى كه‌فته‌و.
له هه‌مان وه‌خت سه‌رۆك حكومه‌ت ناوچه‌يى له پاريزگاى به‌سره‌يش رينمايى داو هه‌ڕه‌شه‌ى ده‌سگيركردن هه‌ر خوه‌ينيشانده‌ريگ كرد ك تايه‌ر سه‌ياره ئاگر بيه‌ێد و جاده‌يل وه‌پى بووڕێد.
له كه‌ربه‌لايش, فه‌رمانده‌يى پۆليس له به‌ياننامه‌يگ وت: په‌يوه‌نديه‌يل فريه‌يگ وه‌پيمانه‌و كرياگه له مه‌ردم شاره‌گه‌و داواى ده‌خاڵه‌تكردن ئه‌كه‌ن ئه‌را كووتاييهاوردن وه حاڵه‌ته‌يل بڕين رێ و بانه‌يل و سزانن تايه‌ر سه‌ياره و به‌سانن خوه‌ندنگايه‌يل و ده‌زگايه‌يل.