شەفەق نیوز - دیالى / بەغداد

سێ کەس گیانیان لەدەس دان، رووژ چوارشەممە، وە رویداوەیل خنکیان و تلیان و تەزیان کارەبا لە بەغداد و دیالە، وەپەی دوو سەرچەوەی ئەمنی و بەیاننامەیگ فەرمی.

 سەرچەوەیگ ئەمنی لە دیالە ئەرا ئاژانس شەفەق نیوز وت، کە تیمەیل گەردین، ئمڕوو، تەرم خوەنەواریگ لە قۆناغ ئامادەیی، لە لەداڵگبۊ ساڵ 2011 پەیا کردن، وە خنکیای لە پرۆژەی ئاو ئاودیاری خاڵس لە خوەرئاوای شار بەعقووبە، دۊای  گومابوینی دۊکە، وە دیاری کرد تەرمەگەی ئەرا فەرمانگەی پزیشک دادوەری بریا.

 سەرچەوەگە وتیش کە هیزیگ ئەمنی دوو لە هاوڕیەیل خوەنەوارەگە لە بنکەی پولیس ناخاڵەیل دەسگیر کرد، ئەرا لێکۆڵینەوە وەردیان و ئاشکراکردن وردەکارییەیل رویداوەگە، و زانین ئەوەگ ئایا خنکیانەگە وە بیئاگایی بۊە یا لە ئەنجام کاریگ تاوانی بویە.

 لە بەغداد، سەرچەوەیگ ئەمنی ئەرا ئاژانسەگە خەوەردا، کە گەنجیگ لە لەداڵگبۊ ساڵ 2005 گیانی لەدەسدا لە ئەنجام رویداو تلیان لە سەرەوخواری پیەڵ دوو قاتی لە ناوچەی دۆرە، دۊای ئەوەگ ماشینیگ کە فەرمانبەریگ لە وەزارەت کارەبا وە تیژی فرەیگ رانیەسەی ئەو گەنجە تلانیە، وەپەی سەرچەوەگە.

 وتیش کە تەرم گەنجەگە ئەرا فەرمانگەی پزیشک دادوەری بریا، لە وەختیگ هێزە ئەمنییەیل رانندەی ماشینەگە وەپەی رێکارە فەرمییەیل جیوەجی کردن.

 لە رویداویگ جیاواز، وەزارەت کارەبا عراقی سەرەخوەشی لە یەکیگ لە کارمەنەیلی کرد، کە ناوی (عەلی مەجيد حمود ساعدی) بۊ، کارمەن لە کۆمپانیای گشتی ئەرا بەشەوکردن کارەبای بەغداد، لق سەدر - کەرت بوب شام، دۊای مردنی وە هوکار زەخمداربۊنی وە تەزەی کارەبا لە مەوقەی جیوەجیکردن ئەركەیلی، وەپەی بەیاننامەیگ کە رەسەیە ئاژانس شەفەق نیوز.