شەفەق نیوز- بەسرە

هەر دوو خام بەسرەی سەنگین و ناوڕاس مامەڵەیل هەفتەگە لەبان زەرەرەیل گەورەیگ کۆتایی وەپێ هاوردن، وەگەرد بەرزەوبوین نرخەیلیان لە دانیشتن کۆتایی، لە وەختیگ نرخەیل نەفت جیهانی بەرزەوبوونیگ سووک وەرجە بەسانن توومار کردن.

خام بەسرەی سەنگین لە دویاین دانیشتنەیل مامەڵەکردن وە بڕ 2.84 دۆلار ئەرا بەرمیلیگ، و وە رێژەی 6.23% بەرزەو بوی، تا لەبان 48.41 دۆلار ئەرا بەرمیلیگ بووەسێد، بەڵام زەرەریگ هەفتانە توومار کرد کە رەسیە 7.25 دۆلار، و وە رێژەی 14.98%، وە بەراورد وەرد نرخەگەی لە سەرەتای هەفتە ک 55.66 دۆلار بوی.

هەمیش خام بەسرەی ناوڕاس وە بڕ 2.84 دۆلار ئەرا بەرمیلیگ، و وە رێژەی 5.73% بەرزەو بوی، تا لەبان 52.41 دۆلار ئەرا بەرمیلیگ بووەسێد، باوجی زەرەریگ هەفتانە توومار کرد ک رەسیە 7.25 دۆلار، و وە رێژەی 13.83%، وە بەراورد وەرد نرخەگەی لە سەرەتای هەفتە کە 59.66 دۆلار بوی.

لەبان ئاست بازاڕەیل جیهانیش، خام خوەرئاوای تێکساس ناوڕاس بەرزەوبوینیگ سووک وەرجە بەسانن توومار کرد تا بڕەسێدە 88.79 دۆلار ئەرا بەرمیلیگ، وە زیایبوین 0.05 دۆلار، و وە رێژەی 0.06%.

لە وەختیگ خام برێنت بەرزەو بوی ئەرا 95.96 دۆلار ئەرا بەرمیلیگ، وە بڕ 0.14 دۆلار، و وە رێژەی 0.15%.

هەمیش  خامەیل ئۆپێک بەرزەو بوی ئەرا 87.79 دۆلار ئەرا بەرمیلیگ، وە زیایبوین 1.01 دۆلار، و وە رێژەی 1.16%.