شەفەق نیوز/ حەشد شەعبی، ئمڕوو چوارشەممە، وەخاکسپاردن ٦٧ مردگ وەپەتای ڤایڕۆس کۆڕۆنا، لە قەورسان وادی سەلام نوو لە نەجەف راگەیان لەماوەی ٢٤ ساعەت، و ئەرک بردن ١٢ تەرم مردگ وەپەتاگە هەڵگرد دویای مەنینیان لە دەیشت خەسەخانەی کندی لە بەغداد پایتەخت.
عەبدول حەسەن حەیدەری وەرپرس نووسینگەی شەهید وزەخمدارەیل لە فیرقەی ئیمام عەلی، لیوای دویەم حەشد شەعبی لە بەیاننامەیگ ك رەسیە ئاژانس شەفەق نیوز وت: ٦٧ مردگەگە ک لە ماوەی ٢٤ ساعەت وەرین وەخاکسپاریان لەی پارێزگایلە بەشەوبوین؛ بەغداد ٥٥ ، نەجەف ٣ ، زیقار ٤ ، واسیت ٣ ، ویەکیگ لە موسەنا، ویەکیگ لە دیالە.
لەلای خوەییش وەڕیەوبەرایەتیەگە لە بەیاننامەیگ وت: دویای بڵاوبوین ڤیدیۆیگ لە بان ماڵپەڕەیل پەیوەندیە کۆمەڵایەتیەگان ئەرا تەرم مردگەیلیگ لە دەیشت سه‌لاجەی مردگەیل لە خەسەخانەی کندی لە بەغداد، به‌ش پزشکی حەشد شەعبی ئەرک بردن ١٢ تەرم مردگ وە کۆڕۆنا هەڵگرد، جوور رەفتاریگ مرۆیی ئەرا رێزگردن لە مردگەیل. هەمیش وەڕیەوبەرایەتیە پزشکیەگە پەیمان دا وە وەردەوامی ئی رەنج مرۆییە.
کورتە ڤیدیۆیگ لە وەردەم دەرگای خەسەخانەی کندی تۆمار کریا، دەرخست لە وڵاوەبوین بڕیگ شەوخەف چەن تەرمیگ مردگ هابانی. لەی باوەتە، مورتەزا سەمیر، وەریەوبەر خەسەخانەی کندی ئەرا ئاژانس شەفەق نیوز وت: ئه‌و مردگەیله‌ تووش ڤایڕۆس کۆرۆنا نەهاتنە.
وتیش ئەرا مقەیەتی یاوەرەیل مردگەگان تەرمەیلیان نەخریا سەلاجەی مردگەیل.