شەفەق نیوز/ سەرکردەیگ لە چوارچیوەی هەماهەنگی، ئمڕوو دووشەممە، ئاشکرای هویردەکاریەیل ئەو کابینەی وەزارەتیە کرد ک محمد شياع سودانی خوازێد دروس بکەێد.
سەرکردەگە ئەرا ئاژانس شەفەق نیوز وت: کابینەی وەزارەتی حکومەت سودانی ٢٢ – ٢٤ وەزارەتە، ٤ وەزارەت لەلیان ئەرا هاوپەیمان سیادە وە سەرۆکایەتی محمد حەلبووسی و خەمیس خەنجەر، و دوو وەزارەت ئەرا هاوپەیمان عەزم وە سەرۆکایەتی موسەنا سامەڕائی، و ٤ وەزارەت ئەرا پارتی دیموکراتی کوردستان چوود، و یەکیگ ئەرا یەکێتی.
وتیش: ١٢ وەزارەت ئەرا چوارچیوەی هەماهەنگی، و ٤ وەزارەت ئەرا دەوڵەت یاسا، و ٦ وەزارەت ئەرا هاوپەیمان فەتح، و دوو وەزارەت ئەرا هاوپەیمان سەروەخوەیەیل.
هەمیش وت: ئەگەر کابینەیل رەسینە ٢٤ وەزارەت، دووانیان ئەرا کەمینەیل چن، یەکیگیان مەسیح وئەوەکە ئەرا تورکمان، و ئەگەر ٢٢ وەزارەت بوین، مەسیح و تورکمان بەش خوەیان لە وەزارەتەیل چوارچیوەی هەماهەنگی بەن.
دیاری کرد ک بەشەوکردن کابینەیل وەزارەتی وەگورەی سیستەم خاڵەیل بەشەو کریەێد، هەر ٥ پەرلەمانتار یەک کابینەی وەزارەتی، و هەر ١٥ پەرلەمانتار یەک وەزارەت سەروەری، وتیش؛ تا ئی مەوقە کابینەی وەزارەتی ئامادە نەویە، وئومید هەس سودانه لە هەفتەی ئایندە بخەێدەی وەردەس ئەنجومەن نوینەرەیل.