شەفەق نیوز/ نرخ دۆلار ئەمریکی وەرانوەر دینار عراقی، ئمڕوو شەممە، لە بازاڕەیل بەغداد پایتەخت و لە هەولێر پایتەخت هەرێم کوردستان جیگیر بوی.
پەیامنێر ئاژانس شەفەق نیوز وت: بۆرسەی سەرەکی کیفاح و حارسیە لە بەغداد پایتەخت، شەوەکی ئمڕوو، لەبان ١٥٣٢٠٠ دینار عراقی وەرانوەر ١٠٠ دۆلار ئەمریکی دەرەیلیان واز کردن، کە هەر خود نرخە لە رووژ پەنجشەممەی گوزەشتە.
پەیامنێر ئاژانسمان وتیش: نرخ فرووشتن و سەنین لە دوکانەیل ناوخوەیی بەغداد جیگیر بوی، کە نرخ فرووشتن ١٠٠ دۆلار ئەمریکی رەسیە ١٥٤٠٠٠ دینار عراقی، و نرخ سەنینی رەسیە ١٥٢٠٠٠ دینار عراقی.
لە هەولێر پایتەخت هەرێم کوردستان، بۆرسە لە رووژەیل پشوو فەرمی کار نیەکەێد، باوجی نرخ دۆلار لە دوکانەیلیگ دراو جیگیر بوی، کە نرخ فرووشتن ١٠٠ دۆلار ئەمریکی رەسیە ١٥٣٩٠٠ دینار عراقی، و نرخ سەنینی رەسیە ١٥٣٥٠٠ دینار عراقی.