شەفەق نیوز/ چەن پارێزگایگ عراقی، ئمڕوو شەممە، ٣٠ مردن و سەدان تووشهاتن نوو وە ڤایڕۆس کۆڕۆنا تۆمارکردن.
سەرچەوەیگ پزشکی ئەرا ئازانس شەفەق نیوز وت: پارێزگای زیقار ئمڕوو شەممە، ٢٢ مردگ تۆمار کردگە و ١٢٣ تووشهاتگ وە ڤایڕۆس کۆڕۆنا.
هەمیش پارێزگای نەجەف ٢٤١ تووشهاتگ نوو وە ڤایڕۆسەگە تۆمار کرد، وەگورەی سەرچەوەیگ پزشکی.
قەزای سوێرە لە پارێزگای واسیت ٥٤ تووشهاتگ نوو وە ڤایڕۆس کۆڕۆنا تۆمار کرد، و دوو مردگ، وەگورەی خەوەر سەرچەوەیگ وەرپرس ئەرا ئاژانس شەفەق نیوز.
لەلای خوەییش، سەرچەوەیگ پزشکی لە دیالە ئەرا ئاژانس شەفەق نیوز وت: دویەکە جومعە، ٢٧١ نموونە تاقیکریا، وئەنجامەگەی ٢٨ تووشهاتگ دەرخست لە قەزا وناحیەگان دیالە.
و دیاری کرد ک یەک حاڵەت ئەرا کادر پزشکی بوی ویەکیگ ئەرا کادر تەندروسی.
سەرچەوەگە بڕ کەڵەکە کریاگ تووشهاتگەیل دیالە گردەوکرد لە ٤ ئادار گوزەیشتە تا ئیسە وە ١٥٩٩ تووشهاتگ لەلیان ٢٥٣ لە کادرە تەندروسیەگانە و ٩٦ کادرە پزشکیەگان.
وتیش؛ ٣ مردن نوو لە پارێزگای دیالە تۆمار کریا، وبڕ کەڵەکەی مردگەیل لەوەخت تۆمار کردن یەکەمین مردن لە ٢٢ ئادار گوزەیشتە تا ئیسە رەسیە ٩٦ کەس، لەلیان یەک پزشکە.
سەرچەوەگە وتیش؛ بڕ خاسەوبویەیل ٣٧ کەس بوی، و هەژمار گشتی ئەرا خاسەوبویەیل لە ١٠ ئادار گوزەیشتە تا ئیسە بویە ٧٣٣ کەس، لەلیان ٨٦ لە کادرە پزشکیەگان. و ئاماژەدا؛ ٧٣٠ بیمار هانە کەرەنتین لە ماڵ میوانی و تەندروسی گشتی و شەهید یاسین سەعدی و کەرەنتین ماڵی.
لە کەرکوک، سەرچەوەیگ پزشکی وەرپرس وت؛ پارێزگاگە دوو مردن وە کۆڕۆنا وەخوەی دی ئەرا دوو پیاو یەکیگیان لە تەمەن ٥٩ ساڵ و ئەواکە لە تەمەن ٦١ ساڵ.