شەفق نيوز- بەغداد/ سلێمانی/ گەرمیان/ كەربەلا
سەرچەوەیلیگ ئەمنی، ئمڕوو شەممە، خەوەردان لە کوشیان ژنیگ وە گولەی براگەی، و مردن پیاییگ وە کارەبا، و پەیاکردن تەرم ژنیگ لەناو ماڵیگ، و زەخمداری دوو کەس وە رویداویگ هاتوچو، و هیزگردن ئاگر، لە پەنج رویداو جیاجیا لە چوار شار عراق.
سەرچەوەگە ئەرا ئاژانس شەفەق نیوز وت: ژنیگ لەناو تەمەن چل ساڵان، نیمەڕو ئمڕوو، لەناو ماڵەگەی لە گەڕەک شێخانی لە پارێزگای سلێمانی وە گولەی براگەی کوشیا، ئەوەیش لە ئەنجام دەمەقاڵیگ خیزانی لەبان میراتی و زەوی و مناڵ.
ئەو سەرچەوە کە نیەخوازێد ناو خوەی ئاشکرا بکەێد، ئەرا پەیامنێر ئاژانس شەفەق نیوز وت: زانیاریەیل سەرەتایی نشان دەن کە ژنە قوربانیەگە خوەی و داڵگی و تەنیا هانە ناو ئەو ماڵە، و براگەی لەناو ماڵەگەید کوشتیەسەی.
تەرم قوربانیەگە ئەرا پزشک دادوەری لە سلێمانی بڕیا، و لێکۆڵینەوە ئەرا رەسین وە بندروس رویداوەگە واز کریا.
هەرلیوا، پولیس ئیدارەی گەرمیان لە هەرێم کوردستان، ئمڕوو شەممە، مردن هاوڵاتییگ وە کارەبا راگەیان، ئەوەیش مەوقەی بەسانن سیبلت لە ماڵەگەی لە قەزای رزگاری سەروە قەزای کەلار.
لە بەیاننامەیگ رەسیە ئاژانس شەفەق نیوز وت: تەرم قوربانیەگە ئەرا پزشک دادوەری بریا، کە ئاشکرا بوی وە تەزیان کارەبا مردگە.
وتیش: قوربانیەگە تەمەنی 34 ساڵ بویە خەڵک قەزای کەلار، و مار لە بەسانن سەردەوکەر و سیبلت کردیاد.
وەگورەی زانیارییەیل، قوربانیەگە وەگەرد براگەی بویە وەختیگ سیبلت ئەرا ماڵیگ بەسانە و کارەبا گردیەسەی و گیانی لەدەسدا، و پولیس وەردەوامە لە لێکۆڵینەوە.
هەمیش لە قەزای کەلار، دوو کەس تویش زەخمداری سەختیگ هاتنە، لە ئەنجام رویداویگ هاتوچو ناوەین دوو ماشین بارهەڵگر.
سەرچەوەیگ ئاگادار ئەرا ئاژانس شەفەق نیوز وت: رویداوەگە لەبان ری دوو سایدی لە شار کەلار ناوەین ماشین بارهەڵگر گەورەیگ و یەکیگیش بویچگ (پیکئاب) بویە.
سەرچەوەگە وتیش: رویداوەگە بویە هوکار زەخمداری هەردوگ رانندەگە، و ئەرا خەسەخانەی سلێمانی بریان.
لە بەغداد، سەرچەوەیگ ئەمنی خەوەردا لە پەیاکردن تەرم ژنیگ کە وەرجە یەک هەفتە مردیە لەناو ماڵەگەی، دویای ئەوە کە هیزەیل ئەمنی ئاگاداری لە هاوڵاتیەیل وەرگردن کە بوو گەنیگ لەو ماڵەو دەرچوود لە ناوچەی غەزالیە خوەرئاوای بەغداد پایتەخت.
سەرچەوەگە ئەرا ئاژانس شەفەق نیوز وت: هیزەیل ئەمنی تەرمەگە هەڵگردن ئەرا پزشک دادوەری، و لێکۆڵینەوە ئەرا رەسین وە بندروس مردن ژنەگە واز کردن.
لە پارێزگای کەربەلا، سەرچەوەیگ ئەرا ئاژانس شەفەق نیوز وت: ئاگر گەورەیگ لەناو بینایگ لە نزیک جادەی مەیسەم تەمار هیز گرد، و تیمەیل وەرگری شارستانی روی وەرەو کپەوکردنی کردن.