شەفەق نیوز/ یەکێتی ئەوروپا، ئمڕوو جمعە، باس نیگەرانیی قویلی کرد وەرانەور زیایبوین لە جیوەجیکردن فەرمانەیل وەسێدارەدان لە عراق، لەوانەیش جیوەجیکردن چەن وەسێدارەدانیگ لە یەک رووژ، و دەسنیشان راپۆرتەیلیگ کرد کە بای جیوەجیکردن زیاتر لە هەشت هەزار زیندانی کەێد چەوەڕی جیوەجیکردن وەسێدارەدان کەن.

پیتەر ستانۆ قسەکەر کاروبار دەیشت ئەوروپا وت: یەکێتی ئەوروپا وە زبری ناڕەزایی لە سزای وەسێدارەدان لە گشت وەختیگ و گشت رەوشیگ کەێد، چوینکە سزایگ سەخت و نامرۆییە، و وەگەرد ئەو مافە نەپووڕیاس کە ری وە رەفتارکردن وە ژیان نیەێد، و نەیش نواگیری تاوان کەێد، و جویر نەفرەتکردنیگ قەبوولنەکریاس ئەرا کەرامەت و بیوەیی مرۆیی، و هەمیش هەڵەی دادوەری کەێدە کاریگ کە گلەوخواردن نەیرێد.

وتیش: یەکێتی ئەوروپا داوا لە عراق کەێد وازهاوردنیگ وەختانە لە وەسێدارەدان بکەێد تا لە کۆتایی وەرەو کۆتایی بچوود، و دووپات کرد لە کارکردن ئەرا پویچەڵکردن سزای وەسێدارەدان لەو وڵاتەیل کەمە کە هیمان جیوەجیی کەن، وەگورەی بڵاوکردن ئاژانس خەوەری "ئاکی" ئیتالی.

رووژ چوارشەممە، ٢٥ ئەیلوول، سەرچەوەیگ ئەمنی خەوەردا کە وەزارەت داد عراقی سزایل وەسێدارەدان لەبان ٢١ تیرۆریست جیوەجی کردر یەکیگیان ژنیگ بوی.