شەفەق نیوز- کەرکووک

گیچەڵیگ تەکنیکی کتوپڕ لە یەکیگ لە پاڵاوگە سەرەکییەیل دابینکەر بەنزین موحەسەن، رووژ یەکشەممە، بۊە مدوو وسانن پرۆسەیل بارکردن مادەگە وەرەو پارێزگای کەرکووک و شمارەیگ لە پارێزگایەیل ترەک، ئەوەگ بۊە مدوو دۊاکەفتنیگ کاتی لە دابینکردن وێستگەیل سزەمەنی وە بڕە دیاریکریاگەیل.

 سەرچەوەیگ حکومی، ئەرا ئاژانس شەفەق نیوز وت، کە گرفتەگە تەنیا لەبان لایەنە تەکنیکییەیل لەناو پاڵاوگەگە وسیا، ئەوەگ هەوەجە وە وسانن پرۆسەیل بەرهەمهاوردن و بارکردن وە شیوەیگ وەختانە کرد تا تەواوکردن کارەیل چاکسازی و گلەوداین یەکە کارپیکەرەیل ئەرا کارکردن وە شێوەیگ بیوەی، لە وەختیگ تیمە تەکنیکییەیل دەسوەجێ دۊای رۊداینی دەس کردنە چارەسەرکردن گرفتەگە.

 وەپای زانیارییەیل، وساننەگە وە رێکاریگ خوەیپارێزی هەژمار کریەێد ئەرا مسۆگەرکردن سەلامەتی پرۆسە کارپیکەرەیل، و مەزەنە کریەێد بارکردن بەنزین خاسەوکریاگ لە رووژ سووا دووشەممەو دەس وەپێ بکریەێدەو، دۊای کووتاییهاتن لە چارەسەرکردن گرفتەگە و گلەوداین پاڵاوگەگە ئەرا توانای کارپیکردنی.

 ئومید هەس تانکەرەیل لە سەرچەوەیل بەرهەمهاوردنەو وەرەو پارێزگای کەرکووک دەس وە جوولە بکەن دەسوەجێ دۊای دەسکردنەو وە پرۆسەیل بارکردن، تا بڕەیل یەک لەشۊن یەک بڕەسنە کۆگایەیل و وێستگەیل سزەمەنی، ئەوەگ هاوبەش بوود لە گلەوداین رێکخستن پرۆسەیل بەشەوکردن و پڕەوکردن هەوەجەیل پارێزگاگە وە شیوەیگ ئاسایی.