شەفەق نیوز/ لە ساعەتەیل سەرەتای شەوەکی، ئمڕوو شەممە، تەم ئاسمان بەغدای پایتەخت پووشیە، و دەسەی گشتی کەشناسی  مەزەنەکەێد کاریگەری وڵاتەگە وە داوەزیان پالەپەستۆگە دروسکریاگ بەستەڵەکی بوود، ئاڵشتکاری لە کەش دروسکەێد و بوودە هووکار ئاڵشتبوین لە کەشوهەوا و واران وارین و داوەزیان پلەی گەرمی گرێدەو.

دەسەگە لە راپۆرتیگ رووژانەی رەسیە ئاژانس شەفەق نیوز راگەیان، کەش سەرەتا رووشن و سەردە، دویای کەمکەمە ئاڵشتبوود ئەرا نیمە ئەور و گاجاریگ ئەور تەواویگ، وەگەرد دەرفەت واران وارین سووکیگ تا وارانیگ ناوڕاس.

ئاشکرایکد، ناوچەیل باکوور و ناوڕاس کەش ئەور و نیمەئەورە، و لەناوچەیل باشوور رووشنە وەگەرد دەرکەفتن بڕیگ ئەور کە لە شەو زیایکەێد، دەرفەت واران وارین سووک مامناوەنیگ دروسکەێد، بەرق و بەڵاچە ها وەگەردیا، دەرفەت واران وارین رفتیگ هەس لە  شارەیل باکوور و خوەرئاوا، لەبان لوتکە کویەیل بەرز هەولێر و سلێمانی سەر وە هەرێم کوردستان وەفر وارێد.

 دەسەگە دیاریکرد، لە ناوچە جیاوازەیل وڵاتەگە لە وەخت شەوەکی ئمڕوو تەم دروسبوود، باوجی لەنیمەڕوو کەمەکەم داوەزێد، و پلەی گەرمی داوەزیان کەمیگ وەخوەی دوینێد بەراورد وە دویکە، و تونی وا وە ئاراستەی جیاواز ها ناوەین  (5-15 كم/ساعەتیگ)، دویای ئەرا باکوور خوەرئاوا ئاڵشتبوود  وە تونی (20-30 كم/ساعة) لەناوچەیل خوەرئاوا، گورجیەگەی بوودە مدوو بەرزەوکردن تەپوتوز، وەتایوەت لەلای خوەرئاوا و باشوور خوەرئاوا.

ئەرا سوو، مەزەنەکرێد وە گشتی کەشە رووشن تا نیمەئەور بوود، لەناوچەیل ناوڕاس و باشوور ئاڵشتبوود ئەرا  ئەور، وەگەرد دەرفەت واران وارین ناوڕاسیگ وەگەرد بەرق و بەڵاچە لە بڕیگ ناوچە، وەرجە ئەوەگ وە تەواوی نەمینێد، پلەی گەرمی وە چەن پلەیگ داوەزیان وەخوەی دوینێد.