شەفەق نیوز/ سەرچەوەیگ ئەمنی لە پارێزگای زیقار، ئمڕوو جمعە، خەوەردا لە تەقین بومبیگ دانریاگ لە باشوور پارێزگاگە، و خوەی دوویەم تەقینەوەس لەی شیوە لە ماوەی چەن ساعەتیگ.
سەرچەوەگە ئەرا ئاژانس شەفەق نیوز وت: تەقینەوەگە لەبان ماڵ هاووڵاتییگ لە تەمەن سیی ساڵانەکان، لە ناحیەی عکێکە لە قەزای سوق شیوخ لە باشوور شار ناسریە بوی، و ئاماژە کرد ک پەلامارەگە لەوەر ناکۆکیەیلیگ هووزانە بوی.
و دیاری کرد ک تەقینەوەگە وە بومبیگ دروسکریاگ بویچگیگ بوی، و تەنیا زەردەیلیگ وەڕوی ماڵەگە رەسان.
وەرجەیە، لە وەخت دیریگ لە شەو پەنجشەممە، بومبیگ دانریاگ لەبان ماڵ وەڕێۆبەر شارەوانی ناسریە تەقیەو، و بویە هووکار زەردەیلیگ دارایی.