شەفەق نیوز/ سەرۆک ناوەند ستراتیجی ئەرا ماف مرۆڤ لە عراق، فازڵ غەراوی، ئمڕوو یەکشەممە، وت: کەیسەیل جیاوەبوین لە ماوەی چوار ساڵ گوزەشتە زیایبوین وەرچەویگ توومار کردن، یەیش رخیگ وەبان سەقامگیری خیزان و کۆمەڵگا دروس کەێد. 

 غەراوی لە قسەیلی کە رەسیە ئاژانس شەفەق نیوز وتیش: شمارەی ئەو تەڵاقەیلە لە عراق لەو ماوە، بیجگە هەرێم کوردستان، رەسیەسە ٣٥٧ هەزار و ٨٨٧ تەڵاق.

وەگورەی ئامار ئەنجومەن دادوەری، ساڵ 2021 ، 73 هەزار و 155 تەڵاق بویە، لە ساڵ 2022 ، 68 هەزار و 410  تەڵاق. 

لە ساڵ ٢٠٢٣ ئەرا ٧١ هەزار و ١٦ تەڵاق بەرزەو بویە، لە ماوەی هەفت مانگ یەکەم ساڵ ٢٠٢٤، ٤٥ هەزار و ٣٠٦ تەڵاق توومار کریاس.

 غەراوی وتیش: ریژەی جیاوەبوین ژن و شوی لە ناوەین ساڵەیل ٢٠٠٤ تا ٢٠١٤ فرە بویە، کە  لە هەر پەنج هاوسەرگیری یەکیگیان وە تەڵاق کۆتایی هاتگە، و شمارەی جیاوەبوین لەو ماوە رەسیەسە ٥١٦ هەزار و ٧٨٤ لە بڕ دوو ملیۆن و ٦٠٠ هەزار هاوسەرگیری، بیجگە لە هەرێم کوردستان .

غەراوی دیاری کرد کە هوکارە سەرەکییەیل زیایبوین تەڵاق لە نەفامستت لە ناوەین ژن وشویە لە ئاست فیکری و کولتووری، دەسوەردان خیزان و برادەر، زیایبوین کێشەی خیزانی و تونوتیژی خیزانی، ریژەی بەرزی ناپاکی هاوسەرگیری، بەد وەکارهاوردن کۆمەڵایەتی میدیا و لاوازی هوشیاری ئایینی و گیچەڵەیل ئابووری.

غەراوی داوا لە حکومەت و پەرلەمان کرد هەموارکاری گرنگ لە یاسای بار کەسایەتی بکەن ئەرا چارەسەرکردن بەشیگ لەو مدووەیلە کە  زیابوین تەڵاق لەبانیان تیەێد.