شەفەق نیوز/ پسپۆر کەشناسی لە دەسەی گشتی کەشوهەواناسی و زەویلەرزە سادق عەتیە، ئمڕوو چوارشەممە، مەزەنەکرد سوو بارستە وایگ باد کە وەگەردیا پلەی گەرمی داوەزێد، کەشوهەوای وڵاتەگە جیگیرەوبوود وەگەرد بەرزەوبوین کەمکەمە تا کۆتایی ئێ مانگەوەرد ئەگەر گاجاریگ بەرزەوبوین تەپوتوز ناوخوەیی.

عەتیە لە پۆستیگ لەبان تووڕ کۆمەڵایەتی وت، لێکدانەوەی خەشتەی کەشناسی دیاریکەن ئەرا بارستە وایگ مامناوەن روی لە وڵاتەگە کەێد لە ماوەی ئمشەو و سوو شەوەکی رووژ  پەنجشەممە، بوودە مدوو دروسبوین شەپوول توز و وەشیوەی زیاتر لە ناوچەیل خوەرئاوا و باشوور خوەرئاوا کاریگەر بوود، کاریگەری کەمتریگ دیرێد لە ناوچەیل ناوڕاس و باشوور، وەگەرد بەشیگ لە باکوور وڵاتەگە.

داوەزیان پلەی گەرمی

وتیش؛ "مەزەنەکرێد وەگەرد بارستەگە شەپوولیگ وای باکوور خوەرئاوای گورجیگ وەگەردیابوود، بوودە مدوو داەزیان وەرچەویگ پلەی گەرمی کە لە رووژ سوو پەنجشەممە 15 ئایا دەسوەپی کەێد و تا رووژ شەممە 17 ئایار وەدەوامە، لەدویای ئیە پلەی گەرمی کەمکەمە بەرزوبوود".

دەرفەت واران

وەپای عەتیە "مزەنەیل دیاریکەن ئرا ئەگەر واران وارین لە رووژ پەنجشەممە لەناوچە جیاوازەیل باکوور وڵاتەگە، کە ئەورەتریشقە ها وەگەردیا، هەمیش لە شەوەکی رووژ پەنجشەممە واران لە ناوچەیلیگ سنووردار لە بەغدای پایتەخت و دیالە وارێد.

جیگیربوین کەشوهەوا

وتیش؛ "مەزەنەیل کەشناسی دیاریکەن کەشەگە روی وەرەو جیگیربوین کەێد لە وەخت نیمەڕوو و ئیوارەی رووژ پەنجشەممە، جیگیربوینەگە   تا نزیکەی هەفتەیگ یا دوو هەفتەس، وگەردیا ئاسەوار تەپوتوز ناوخوەیی مینێد کە گاجاریگ لەئەنجام گورجەوبوین وا دروسبویە".