شەفەق نیوز- ئەنبار
سەرچەوەیگ ئەمنی، رووژ دووشەممە، خەوەردا لە چووڵکردن بارەگایەیل حەشد شەعبی لە پارێزگای ئەنبار خوەرئاوای عراق، لەوەر بەرزەوبۊن گرژییەیل ناوەین ئیران و ویلایەتە یەکگرتگەیل.
سەرچەوەگە ئەرا ئاژانس شەفەق نیوز وت، کە رێکارەیل کەمەوکردن شمارەی کارمەنەیل لەناو بارەگایەیل گردە خوەی، وەگەرد هیشتن شمارەیگ سنووردار لە رووڵەیل پارێزگاگە ئەرا پاراستنیان و وەدۊاکەفتن ئەرکە بنەڕەتییەیل.
هەمیش وت، کە کارکردن لەناو بارەگایەیل وەپای سیستم دەوام نۆرەیی وەڕیەو چوود، لە وەختیگ رێکارەیل چۊ گامیگ خوەیپارێزی گیريانەسە وەر لەوەر ئەگەر تۊشهاتنیان وە ئامانجگرۆن، لە سای پیشهاتە ئەمنییە زویوەزوەیل ناوەین ئیران و ویلایەتە یەکگرتگەیل.
سەرچەوەگە دیاری کرد کە ئەو کارمەنەیلە کە هیشتیانەسەو ئەرک پاراستن بارەگایەیل و وەدۊاکەفتن کارە بنەڕەتییەیل لەناوی گردنەسە دەس.
ئی رێکارەیلە لە وەختیگ تیەێد کە ناوچەگە بەرزەوبۊنیگ سەربازی ناوەین ئیران و ویلایەتە یەکگرتگەیل وەخوەی دوینێد، کە سوپای پاسداران ئیرانی لە سەعاتەیل گوزەشتە خەوەردا لە ئامانجگردن شوینەیل هیزە ئەمریکییەیل لە بنکەی "مەنهاد" لە ئیمارات، و هەردوگ بنکەی مەلیک حسێن و ئەزرەق ئاسمانی لە ئوردن، لە جواو ئەو گورز ئەمریکییە کە دوڕگەی لارک ئیرانی لە تەنگەی هورمز کردە ئامانج.