شەفەق نیوز/ سەرچەوەیگ ئەمنی، ئمڕوو شەممە، خەوەردا کە کەسەیلیگ نەناسیای موفەوەزیگ پولیس فیدراڵی وە ماشین تلاننە، مەوقەی ئەرکەگەی لە ناوچەی کەڕادە ناوڕاس بەغداد پایتەخت.
سەرچەوەگە ئەرا ئاژانس شەفەق نیوز وت: کەسەیلیگ نەناسیای وە ماشینیگ پیکئاپ میستوبیشی مفوەز (أ. ف. ح) لەداڵگبوی 1990 لە پولیس فیدراڵی مەوقەی ئەرکەگەی تلاننە، دویای ئەوە کە داوا لەلییان کردگە بوسیەن لە خاڵیگ وەشکین لە ناوچەی کەڕادە.
سەرچەوەگە دیاری کرد کە تەقەکردن کەفتە ناوەین ئەو کەسەیلە وەگەرد ئەندامەیل ئەمنی، وەلێ توەنستن وەرەو شوین نادیاریگ بوان، دیار کرد کە پای راس پولیسەگە زەخمدار بوی، و ئەرا خەسەخانە بریا.
لە خەوەریگ ترەک، وەڕیەوبەرایەتی دژە تاوان بەغداد، دەسگیرکردن ژنیگ وە توومەت رفیان دویەتیگ باشوور بەغداد راگەیان.
لە بەیاننامەیگ رەسیە ئاژانس شەفەق نیوز وت: مەفرەزەیل وەڕیەوبەرایەتی دژە تاوان بەغداد/ نویسینگەی دۆرە، توەنستن ژنیگ دەسگیر بکەن، وە تاوان رفانن دویەتیگ لە ناوچەی دۆرە.