شەفەق نیوز/ سەرچەوەیگ ئەمنی، ئمڕوو دووشەممە، خەوەردا لە پویچەڵکردن  دوو تەقەلای خوەیکوشی لەبان بەرزترین دوو پیەل و هەڵگردن تەرمیگ لە چەم دیجلە لە ناوچەیل جیاواز لە پایتەخت عراق بەغدا. 

سەرچەوەگە وە ئاژانس شەفەق نیوز وت، مەفرەزەیل فریاگوزاری دەریاوانی کەسیگ قورتارکردنە ک تواستیە خوەی لەبان پیەل جادریە لەناوراس بەغدا بخەێدە خوار ئەرا ناو چەمەگە وە مەبەست خوەیکوشتن، دیاریکرد رادەس دەزگایەیل تایبەت کریایە ئەرا رێکارەیل یاسایی. 

دیاریکرود، فریاکەفتن کەسیگ قورتارکردنە ک تەقەلای خستنەخوار خوەی دایە لەبان پیەڵ 14 رەمەزان لە مەنسوور وەمەبەست خوەیکوشتن، دووپاتکرد رادەس یەکیگ لە ناوەندەیل ئاسایش کریایە. 

سەرچەوەگە وتیش، مەفرەزەیل فریاکەفتن دەریاوانی، تەرم گەنج نقووم بویگ لەناو چەم دیجلە پەیاکردنە لە چوارچمگ ناوچەی پیەڵ دیالە لە بەغدا، وتیش تەرمەگە هویچ شوینەواریگ زەبر دەرەکی لەقێیەو نییە، وەگورەی زانیاریەیل رویداوەگە لەمەوقەی مەلەوانی رویدایە.