شەفەق نیوز- بەغدا

ئاژانس هەواڵگری و لێکۆڵینەوەیل لە وەزارەت ناوخوەی، ئمڕوو دوشەممە، دەسگردن وەبان 2163 کارتۆن لە کەرەستەییل جوانکاری جویراوجویر و سەرچەوەیل جیاواز لەناو ئەمباریگ لە ناو  ماڵ یەکیگ لە توومەتبارەیل لە بەغدا پایتەخت راگەیان.

ئاژانسەگە لە بەیاننامەیگ  رەسیە ئاژانس شەفەق نیوز وت:  پرۆسەگە لەلایەن مەفرەزەیل بەرەنگاربوین تاوان رێکخراگ لە رەسافە جیوەجی کریا، وە تەقەلایگ هەواڵگری و تەکنیکی و چەودێری هویرد، و دیاری کرد  کەرەستەیل دەسوەبانگیریاگ 900 کارتۆن گردبویە خوەی کە بەروار دروسکردنیان وەسەرچگە، و ڕەزامەندییەیل یاساییی نەداشتن.

وتیش؛  پرۆسەگە لەماوەی جیوەجیکردن فەرمان دەسگیرکردنیگ دادوەری هات لەوەرانوەر توومەتبار (ط. ج. م.) وەپای مادەی 35 تایبەت وە ساختەکردن نیشانەییل بازرگانی، و دیاریکرد، لێکۆڵینەوەیل سەرەتایی دەرخسن  توومەتبارەگە کارخانەییل دەیشت عراق ئەرا دروسکردن ئی کەرەستەیلە وەکارهاوردیە، زانیاری بازرگانی هەڵە  وەبانیان دانایە.

ئاژانسەگە داوا لە هاووڵاتییەیل کرد کە هووشیار بوون لە وەخت سەنن یا وەکارهاوردن کەرەستەییل جوانکاری، و دڵنیا بوین لە سەرچەوە و دروسی زانیارییەیلی، و دویرەوبکەفن لە   سەندنیان لە ماڵپەڕ و لایەنەیل نەناسریاگ، ئەرا پاراستن سەلامەتی خوەیان.