شەفەق نيوز- بەغداد 

پلەی گەرمی لە پارێزگای بەسرە، ئمڕوو یەکشەممە، لە نیمەی پلەی کوڵیان رەد کرد، و یانزە ناوچەی عراقی لەناو بەرزترین پلەی گەرمی بوین لە ئاست جیهان.

 ویستگەی "بلاسيرفيل" لە کالیفۆڕنیای ئەمریک خشتەیگ بڵاو کرد لە 15 ناوچە و شار جیهانی کە لە ماوەی 24 ساعەت گوزەشتە بەرزترین پلەی گەرمی توومار کردنە.

لە خشتەگە دیاری کەێد کە ناوچەی فڕوکەخانەی ناودەوڵەتی بەسرە بەرزترین پلەی گەرمی لە جیهان توومار کردگە، وە 50.3 پلەی سەدی، و لە شوینی لە پلەی دویەم ناسریە وە 49.7 پلەی سەدی، ئیجا شار عەبادان لە ئیران لە پلەی سێیەم وە 49.6 پلەی سەدی، ئیجا شار ئەلبەسرە حوسەین چوارەم وە 49.5  پلەی سەدی، و شار عمارە لە عراق بویە پەنجەم وە 49.4 پلەی سەدی.

وەگورەی ئەو خشتە، شار خانەقین لە پارێزگای دیالە کەفتە پلەی شەشەم وە 49.1 پلەی سەدی، و شار تکریت لە سەڵاحەدین هەفتەمە وە 49.1 پلەی سەدی، ئیجا فڕوکەخانەی ناودەوڵەتی کوێت وە 48.9 پلەی سەدی هاتە پلەی هەشتەم، و لە پلەی نۆهەم شار ئەهواز لە ئیران وە 48.4 پلەی سەدی، و ناوچەی فاو لە عراق وە 48.7 پلەی سەدی لە پلەی دەهەم بوی، لە شوینی ناوچەی عەلی غەربی لە عراق لە پلەی یانزەهەم وە 48.5 پلەی سەدی، و بەدرە لە واست وە 48.5 پلەی سەدی کەفنە پلەی دوانزەهەم، و دووزخورماتوو لە پلەی سیانزەهەم وە 48.5 پلەی سەدی، ئیجا رفاعب لە پلەی چواردەهەم وە48.4 پلەی سەدی، و لە پایان شار سەماوە لە عراق وە پلەی گەرمی 48.4 پلەی سەدی.