شەفەق نيوز/ وەڕیەوبەرایەتی ناوخوەیی لە قەزای فاو لە پارێزگای بەسرە، ئمڕوو چوارشەممە، داوا لە حکومەت فیدراڵی کرد مەرز نوویگ وەرد ئیران دروس بوود.
وەگورەی بەڵگەنامەیگ فەرمی وەلایەن وەلید محمد عەبدولخدر قایمقام فاو واژوو کریاس، و ئەرا ئەسعەد عیدانی پارێزگار بەسرە کلکریاس، خوازن وەو مەرزە جویلەی بازرگانی و ئابووری گورجەو بکەن و هامشوو بازرگانی ناوەین دوو وڵات بەرزەو بکەن، هەمیش ئەرا پەیاکردن دەرفەتەیل کار ئەرا خەڵک قەزاگە و ناوچەیل دەورگردی.
لەلای خوەییش، پارێزگار بەسرە پشتگیریی لەو داوا نشان دا، و رینمایی دا وە قسەکردن وەرد وەزارەت ناوخۆ و دەزگای مەرزەیل سنووری ئەرا جیوەجیکردن ریکارەیل.
پارێزگای بەسرە مەرزیگ سنووری سەرەکی لە هشکایی وەرد ئیرانەو دیرێد، کە مەرز شەلامچەس، کەفێدە وەرەو خوەرهەڵات لە شار بەسرەو، کە شوینیگ گرنگە ئەرا هامشوو مەردم و چشتەیل، وەتایبەت لە وەرزەیل زیارەتەیل ئاینی، کە دەیان هەزار زیارەکەر ڕیێانر وەپیا رەد بوون.
هەرچەن شوینەیلیگ ئاوی جویر مەرز لە شەتلعەرەب هەس، وەلێ مەرز شەلامچە تەنیا مەرزیگ فەرمیە لە پارێزگاگە.