شەفەق نیوز/ ستیڤن هیتشن باڵیۆز بەریتانیا لە عراق، ئمڕوو چوارشەممە، گاڵ ئەرا دروسکردن کوتپڕ حکومەت فیدڕاڵی هاتگ دا لە عراق، و هوشداری دا لە بەدناوکردن وڵاتەگە ئەگەر ئەزموون دانوسەنین سیاسی درویژماوە دووارەو بوود، کە رەسیە حکومەت ئیسە وە سەرۆکایەتی محمد شیاع سودانی.
ئەو وتارەیلە لەناو دانیشتن گفتوگۆ لە پەراویز کارەیل رووژ دویەم لە کۆنگرەی "عراق ئەرا وزە"، لە بەغداد پایتەخت هات.
وتیش: ژینگەی ئاسایش عراق پەسا خاسەو بوود، ئەگەر بنووڕیکنە رەوش ئەمنی لە 2025 وەچەو ئەو ساڵەیل فرە خاسترە، و رویکردن ئەرێنیی هەس وەرانوەر ئاسایش و حکومەت محمد شیاع سودانی وە بازنەی یاسایی چوود، و یەیش بەشیگە لە دویرکەفتن بەشیک لە کۆمپانیایل بەریتانی و ئەورووپی و خوەرئاوایی وەگشتی.
دووپاتیش کرد کە لە سەردان سودانی ئەرا لەندەن چەن رێککەفتنیگ واژوو کردیمن لەبان پڕۆژەیل گەورە کە خەرجیان رەسێدە 12 مليار ئیسترليني و یەیش پویل فرەیگە.
هيتشن وتیش: پشتگیری لە تەمای سەرۆک وەزیرەیل عراق کەیمن کە عراق بتوەنێد لە ساڵەیل بانان وزە خاس وەکاربارێد، و کار هاوبەش هەس ئەرا جیوەجیکردن پلان کۆتاییهاوردن وە سزیان گاز هاوتەکان نەفت لە عراق، و توانای سوودگردن لە داهاتەیل گاز هەس وە خەرجکردن لە چینەیلیگ ترەک جویر پەروەردە و تەندروسیی.
وتیش: پلان کۆتاییهاوردن وە سزیان گاز چەن ساڵیگ کیشێد، وەلێ گرنگە ئاست جیوەجیکردن پلانەگە لە ساڵەیل ئایندە دیاری بکریەێد.
باڵیۆز بەریتانیا وتیش: ئەگەر دویای هەوژاردن ماوەی دانوسەنین دروسکردن حکومەت فیدڕاڵی هاتگ لە هەکاتی حکومەت ئیسە لە ساڵ 2021 دیر بکەفێد، ئەوەسا ئەرک جیوەجیکردن ئەو پرۆژەیل گرنگە لە وڵات سەختەو کەێد، کە بەدناو وڵاتەگە کەێد، و دووپات کرد کە گرنگە حکومەت دویای هەڵوژاردن زیوەزوی دروس بکریەێد.