شەفەق نیوز ـ بەغدا

زانیاریەیل راپۆرت ئیوەتکردن مریشک ئەرا ساڵ 2025 کە وە لایەن دەزگای ناوەندی ئامارەو دەرچگە، دەرخست کە بەرهەمهاوردن مامر گووشتی (زینگ) و خا لە عراق لە ساڵ گوزەشتە کەمەوبوویە، لە وەرانوەر ئاستەیل بەرهەمهاوردن کە لە ساڵ 2024 توومار کریاوێد.

وەپای راپۆرتەگە، بڕ بەرهەمهاوردن مامر گووشتی زینگ لە عراق (بیجگە لە هەرێم کوردستان) رەسیەسە نزیکەی 163.5 هەزار تەن لە ساڵ 2025، یەش داوەزیان 8.3% نیشان دەێد لە بەرهەم ساڵ 2024 کە 178.3 هەزار تەن بوی ئەرا پارێزگایەیل کە گرێدەیانەو.

هەمیش بەرهەمهاوردن خا لە عراق لە ساڵ 2025 داوەزیا ئەرا نزیکەی 4,313.2 ملیۆن خا، لە وەرانوەر 5,313,586 ملیۆن خا لە ساڵ 2024، کە کەمەوبوونیگ وە رێژەی 18.8% توومارکردگە.

زانیاریەیل دەزگای ناوەندی ئامار دیاری کەن کە بەرهەمهاوردن مامر گووشتی زینگ لە ماوەی ناوەین ساڵەیل 2020 تا 2025  بانوخوارکردن وەخوەیدییە، لە ساڵ 2020 بەرهەمهاوردنەگە 156.5 هەزار تەن بوی، وەرجە ئەوەگ داوەزێد ئەرا 144.7 هەزار تەن لە ساڵ 2021. دویای ئەوەگ کەمکەم دەسکردە بەرزەوبوین، لە ساڵ 2022 رەسیە 162.5 هەزار تەن و لە ساڵ 2023 رەسیە 172.3 هەزار تەن، تا بەرزترین ئاست خوەی لەو ماوە توومارکرد لە ساڵ 2024 وە 178.3 هەزار تەن، وەرجە ئەوەگ ئەرا 163.5 هەزار تەن لە ساڵ 2025 داوەزێد.

باوجی بەرهەمهاوردن خا رێگەیگ ترەک گردەوەر؛ لە 1,118.404 ملیۆن خا لە ساڵ 2020 بەرزەوبوی ئەرا 2,699.039 ملیۆن خا لە ساڵ 2021، دویایی وەردەوام بوی لە چگنەبان تا رەسیە 5,010.491 ملیۆن خا لە ساڵ 2022. دویای ئەوە داوەزیا ئەرا 4,778.441 ملیۆن خا لە ساڵ 2023، وەرجە ئەوەگ دووارە بەرزەوبوو ئەرا 5,313.586 ملیۆن خا لە ساڵ 2024، و دویایش داوەزیا ئەرا 4,313.169 ملیۆن خا لە ساڵ 2025.