شەفەق نیوز/ وەڕێەوبەرایەتی هاتوچو گشتی، ئمڕوو دووشەممە، ئامار دڵتەزنیگ لە شمارەی رویداوەیل هاتوچو راگەیان، ک لە سەر ئی ساڵەو ٢٠٢٢ توومار کریانە.
ئمڕوو دووشەممە، ٢١ تەشرین دویەم کەفێدە رووژ جەهانی یادکردن رویداوەیل هاتوچو.
عەمید زیاد قەیسی وەڕیەوبەر پەیوەندی وراگەیانن هاتوچو ئەرا ئاژانس شەفەق نیوز وت: وەڕێەوبەرایەتیەگە هەرلە رووژ ١/١/٢٠٢٢ تا ئمڕوو ٦٦٧٨ رویداو هاتوچو لە تلیان و پلیان و لەیەکدان توومار کردیە.
لەباوەت شمارەی قوربانیەیل ئەو رویداوەیلە، قەیسی دیاری کرد ک ئامار مردن و زەخمدارەیل کار وەزارەت تەندروسیە نەگ هاتوچو گشتی.
قەیسی سێ هووکار ئەرا رویداوەیل دیاری کرد ک خوەیان؛ "پاباەندنەوین رانندە وە رینمایل، و نەوین توکمەیی و سێفتی لەناو ماشین، وەگەرد بەدی ریوبانەیل" وتیش: ئەو ریەیلە ک وەشیوەی خاسیگ ئامادەکاری نەکریانە وە شیوەی فرەیگ بوونە هووکار رویداوەیل هاتوچو.
وەڕیەوبەر پەیوەندی و راگەیانن هاتوچو تەمەی رانندەیل کرد ک پابەند وە یاسا و ڕینمایل هاتوچو بوون وەخاتر بیوەیی گشتی.