شەفەق نیوز/ دیار بەرواری نوێنەر فراکسیۆن پارت دیموکرات کوردستان لە پەرلەمان عراق، ئمڕوو پەنجشەممە، جەخت کرد لە گرنگی گونجانن رەوشەگان لە ناوچە دابڕیایەگان ئەرا مقەیەتیکردن ئاسایش هەرێم و عراق وەگشتی، و ئاماژە کرد ک جەختەیلیگ سیاسی هەس ئەرا ریگری لە جیوەجیکردن مادەی ١٤٠.

بەرواری ئەرا ئاژانس شەفەق نیوز وت: حکومەت عراقی وەرین و حکومەت ئیسە، هیچ نیاز راسییگ لە باوەت جیوەجیکردن مادەی ١٤٠ لە دەستور عراقی و گونجانن رەوشەگان لە ناوچە دابڕیایەگان نەیرن، و ئەیە گشتی لەوەر ئەو جەختەیلە ک ئی حکومەتەیلە لە لایەنەیلیگ سیاسی کەفنە وەریان، و ئامانجەگە لەی جەختە خوەی ریگردنە لە هەر هەماهەنگییگ و هاوکارییگ ئەمنی و سەربازی لەناوبەین بەغداد و هەولێر.

و دیاری کرد ک بۆشایەیلیگ ئەمنی مەترسیدار و گەورایلیگ هەس، ئەراوە بایەدە رەوشەگان لەی ناوچەیلە بگونجیەن، نەگ لەڕی ئەوە ک وەڕێۆبەرنی وەدەس تەنیا پێشمەرگە بوود، بەڵکم وەڕێوبردن هاوبەشیگ لەناوبەین بەغداد و هەولێر بوود، ک ئی بۆشاییەیلە هەڕەشەیلیگ نەگ ئەرا هەرێم تەنیا دروس کەن، بەڵکم ئەرا گشت عراق، وەتایبەت ک ناوچەیلیگ هەس کەفنە وەر پەلامارەیلیگ تیرۆری، ک ریخریاگ داعش ئی بۆشاییەیلە ئەرا جوولەی خوەی وەکار تیارێد.

نۆینەرەگە لە فراکسیۆن پارت دیموکرات کوردستان لە پەرلەمان عراق هەمیش وت: مەنین رەوشەگان وەی جوور ئیسەیانە وەبی گونجانن رەوشەگان لە ناوچە دابڕیایەگان، و وەبی ئەوە ک وەڕێوبردن هاویەشیگ لەناوبەین بەغداد و هەولێر بوود، واتە رخ و نیگەرانیەگە لە ئامانجکردن هەرێم و عراق وەگشت ناوچەگانی وەردەوامە، وەتایبەت ک ئی بۆشاییەیلە هەڕەشەی ئاسایش و ئارامی عراق دەن، وشایەت بۆشایەیلیگ لە ناوچەیلیگ تر لەیانە مەترسیدارتر واز بکەێد.