شەفەق نیوز ـ دیالە / کەرکوک
پارێزگایەیل دیالی و کەرکووک دوو رویداو دڵتەزن وەخوەیان دین کە بویە مدوو گیانلەدەسدان سێ مناڵ لە ئەنجام هیزگردن ئاگر لە ناو ماڵیان لە قەزای جەلەولا، و مردن گەنجیگ مەوقەی تەقەلادان ئەرا رزگارکردن براگەی لە خنکیان لەناو بەنداو خاسە.
لە دیالە، لە دیر وەخت دویەشەو جومعە ئاگر لەناو ماڵیگ لە شار جەلەولا باکوور خوەرهەڵات پارێزگاگە هیزگرد، لە ئەنجام داڵگ و سێ مناڵی تویش زەخمداری هاتن کە ئەرا چارەکردن کلکریانە خەستەخانەی فریاکەفتن جەلەولا.
سەرچەوەیگ ئەمنی وە ئاژانس شەفەق نیوز وت، سێ مناڵەگە لەداڵگبوی (2023 و2024 و2026)،گشتیان وە مدوو زەخمداریان گیان لەدەسدان، و باوجی داڵگیان تا ئیرنگە لە خەستەخانە چارەسەر وەرگرێد.
وتیش: هێزە ئەمنیەیل شویەگەی دەسگیرکردن لە دویای داد ژنەگە ئەرا هەبوین گیچەڵ خێزانی، دیاریکرد لێکۆڵیناوە فراوانیگ لە چۆنیەتی رویداوەگە وازکریاس.
لە کەرکوک، سەرچەوەیگ ئەمنی ترەک وت، گەنجیگ وەناو (محەمەد حسێن عەلی) لە داڵگبوی 2009 وەگەرد براگەی و چەن کەسیگ لە بەنداو خاسە لە باشوور پارێزگاگە بوین، براگەی مەوقەی مەلەکردن تویش خنکیان بوود یەیش بوودە مدوو ئەوەگ زوی وەناو ئاوەگە داوەزێد و تەقەلای رزگارکردنی بدەێد.
ئاشکرایکرد، گەنجەگە توەنستیە برەسێد وە براگەی باوجی هاز ئاوەگە سەختی مەلەکردن بوودە مدوو خنکیانی، تیمەیل فریاکەفتن کە لە شوینەگە بوین توەنستن براگەی درارن و رزگاری بکەن، باوجی محەمەد وەرجە دراوردنی لە ئاو گیان لەدەسدەێد.
دیاریکرد، مەفرەزەی پۆلیس دەریاوانی زوی رەسینەس شوین رویداوەگە تەرمەگە دراوردن و ئەرا پزیشک دادوەری کلکریا، لێکۆڵینەوە لە رویداوەگە وازکریا.