شەفەق نیوز- ئەنبار

سەرچەوەیگ حکومی لە قەزای قائیم لە خوەراوای ئەنبار، ئمڕوو سێشەممە، خەوەردا لە پەیاکردن تەرم گەنجیگ کە رەگەزنامەی سووری هەڵگردگە لە ناحیەی عبێدی، دۊای چەن رووژیگ لە خنکیانی لە چەم فورات.

 سەرچەوەگە ئەرا ئاژانس شەفەق نیوز وت: گەنجەگە ناوی کازم جەلود خەلفانە، لەداڵگبۊ ساڵ 1995، وەگەرد براگەی  لە چەم فورات لە ئاوایی سوێعیە لە خوەرهەڵات شار بوکەماڵ سووری خنکیاس، لە وەختیگ براگەی رزگار کریاس.

وتیش کە تەرم کازم ئەرا پزیشک دادوەری بریاس، جویر ئامادەکارییگ ئەرا تەواوکردن رێکارەیل و داینی وە دەس کەسوکاری.

لە لای خوەییشەو، وەڕێوەبەر راگەیانن وەرگری شارستانی لە پارێزگای ئەنبار محمد تارق، ئەرا ئاژانس شەفەق نیوز وت، کە تیمەیل رزگارکردن تەقەلایەیلیان خەسەو کردنە ئەرا مینەکردن کەسیگ کە دیار نەماگە لە ئەنجام رۊداو خنکیان لە یەکیگ لە چەمەیل پارێزگاگە.

تارق ئەرا ئاژانس شەفەق نیوز دیاری کرد کە تیمەیل رزگارکردن هەگ خەوەرەگە رەسیەسە پیان جۊلە کردنە، و تەقەلایەیل خەسیگ دانە ئەرا پەیاکردن کەسە دیارنەماگە.