شفق نیوز- نەجەف

دادگای تاوانەیل نەجەف، ئمڕوو یەکشەممە، سزای 10 ساڵ زیندانی وەبان تاونباریگ دەرکرد کە وە فرووشتن گوشت وەراز لە پارێزگاگە دەس داشت، کە کەیسەگەی لە ماوەی چەن رووژ گوزەشتە بویە شوین قسەوباس گشتی، وەپای سەرچەوەیگ دادوەری.

سەرچەوەیگ ئەمنی وە ئاژانس شەفەق نیوز خەوەردا، نزیکەی وەرجە دوو هەفتە، تیمیگ ئەمنی لە هەواڵگێری خاوەن دووکانیگ گووشتفروشی دەسگیرکردن کە وەراز کویەیی راوکردیە لە هزر ناحیەی حوریە لە قەزای کوفە، وە ناوەی (گووشت هویردکریاگ) وە هاوڵاتیەیل فروشتیەسێ لە ناوچەی لە ناوڕاس شار نەجەف.

پسپۆر یاسا و دەستوور حەبیب قورەیشی لە هەفتەی گوزەشتە دووپاتکرد،  هیچ دەقیگ تاوانی لە یاسای عراقی نییە کە فرووشتن گوشت وەراز تاوانبار بکەێد، ئاشکرایکرد حەرامبوین گووشت گوراز لە ئاین ئیسلام  وە ئەو مانا نییە  راستەوخوە هەر کاریگ پەیوەنی وەپی داشت بوودە تاوان، هیچ دەقیگ یاسایی نییە وەشیوەی دیاریکریاگ کارەگە  وە تاوان دیاریبکەێد.