شەفەق نیوز- بابل / دیالە
10 کەس وە چەقوو زەخمدار بوین لە وەردەوەردەیگ لە پارێزگای بابل، لە خود وەخت دوو کەس وە رویداو هاتوچو لەبان ری بەغداد - خاڵس لە پارێزگای دیالە زەخمدار بوین.
بەیاننامەیگ فەرمانگەی تەندروسی بابل رەسیە ئاژانس شەفەق نیوز دیاری کرد، فریاکەفتن خەسەخانەی گشتی ئیمام عەلی پیشوازی لە 10 کەس کردگە کە وە مدوو وەردەوەردەیگ وە چەقو زەخمدار بوینە، و ئاشکرا کرد ستاف پزیشکی و پەرستاری دەسوەپیکردن وە پیشکەشکردن فریاگوزاری و رێکارەیل پزیشکی سەرەتایی هەوەجەکریاگ ئەرایان.
بەیاننامەگە وتیش، یەکیگ لە زەخمدارەیل ئەرا خەسەخانەی نەشتەرگەری حیللە کلکریا ئەرا تەواوکردن چارەسەری.
لە دیالە، سەرچەوەیگ ئەمنی خەوەر دا لە زەخمداربوین دوو کەس وە مدوو رویداو هاتوچو لەبان ری بەغداد – خاڵس، وەرانوەر لوقونتەخانەی زیفاف دیجلە، بی ئەوەگ هویردەکاری زیاتر لەبان چوینیەتی رویداوەگە باس بکەێد.