شه‌فه‌ق نيوز/ ئاماريگ راێ گفتگوو له يابان ئه‌وه ده‌رخست ك زوورم كومپانيايه‌يل وڵاته‌گه لايه‌نگرى وازكردن قاپى له‌وه‌رده‌م كووچكه‌ره‌يل ئه‌كه‌ن، وه‌لێ وه‌ل ئه‌وه‌يشا مه‌رجيان ئه‌وه‌سه سه‌رڕشته‌داره‌يل و شاره‌زايه‌يل ئه‌خوزان.
له‌ى باوه‌ته‌و، رووژنامه‌ى "جابنيز تايمز" له زووان ده‌سه‌ى نيكى ئه‌را توێژنه‌وه‌يل وت: كومپانيايه‌يل يابانى باوه‌ڕيان ئه‌وه‌سه قاپى ئه‌را هاوردن كووچكه‌ره‌يل واز بكريه‌ێد له‌وه‌ر چاره‌سه‌ر كيشه‌ى كه‌ميى كارگه‌رێ له وڵاته‌گه.
جى باسه، يابان نگه‌رانه وه‌ده‌س كه‌ميى له داهات به‌شه‌رى وه بوونه‌ى كزى نسبه‌ت زاوزێكردن و به‌رزه‌وبوين وه‌رده‌وام پيرى، چونيكه وه‌گووره‌ى ئاماره‌يل ئه‌وه ده‌ركه‌فتگه ك يابانيه‌يل ملله‌تيگن ك دريژترين ته‌مه‌ن ئه‌كه‌ن له جه‌هان له‌دوياى هه‌رێم هۆنگ كۆنگ له چين.