شەفەق نیوز/ دەسەڵاتەیل لە زنجبار تانزانیا خەوەردان کە ٨ مناڵ و یەک گەورە گیانیان لەدەس دان لەوەر خواردن گووشت کیسەڵ دەریایی لە دوورگەی بیمبا، و ٧٨ کەسیش ئەرا خەسەخانە بریان.
حاجی بکاری وەرپرس پزشکی لە ناوچەگە وت: ئەو کەسە کە مردگە داڵگ یەکیگ لەو مناڵەیلە بوی کە لە وەرجەیە لەی هەفتە مردگە، وتیش: لە رووژ سێشەممە گووشت کیسەڵ خواردنە.
بکاری وتیش ئەنجامەیل تاقیگە دەرخستن کە گشت قوربانیەیل گووشت کیسەڵ خواردنە.
گووشت کیسەڵ دەریایی لەلای خەڵک ئەو ناوچە جویر خوەراک خوەشتامیگە، هەرچەن لەوەر جویریگ لە ژەهراوی بخوەری رەسنێدە مردن.
لە نۆڤەمبەر ٢٠٢١، هەفت کەس لە بیمبا گیانیان لەدەس دان و مناڵیگ لەناویان بوی، ئەوەیش دویای خواردن گووشت کیسەڵ.