شه‌فه‌ق نيوز/ سه‌رچه‌وه‌يليگ ئاگادارى ئاشكراى ئه‌وه كردن دوير نيه سعوديه رێ وشوون تون له‌باره‌ى شماره‌ى حاجيه‌يل ئمساڵ بگرێده وه‌ر له‌وه‌ر نواگيرى له بڵابوينه‌وه‌ى ڤايرۆس كۆرۆنا، ئه‌ويش دوياى ئه‌وه‌گ شماره‌ى تويشبوين له وڵاته‌گه ره‌سيه زياتر له 100 هه‌زار حاڵه‌ت.
له‌ى باوه‌ته‌و، دو سه‌رچه‌وه‌ى ئاگادار له مه‌سه‌له‌گه باس له‌وه كردن ك ده‌سڵاته‌يل سعوديه له ئيسه‌وه هوير له‌وه ئه‌كه‌ن ته‌نيا رێ وه شماره‌يگ دياريكرياێ له حاجيه‌يل بدريه‌ێد ئه‌را حه‌جكردن ئمساڵ، وه‌ل چه‌سپانن مه‌رجه‌يليگ ئه‌را نواگيرى له حاجيه‌يل وه‌ساڵاچگ ك ته‌مه‌نيان گه‌وراس و ئه‌نجامداين وشكانن زيايه‌ى ته‌ندروستى.
سه‌رچه‌وه‌يگيش ئه‌را روێته‌رز باس له‌وه كردگه له‌ڕێ گرتنه‌وه‌ر رێ وشوونه‌يل تون، ده‌سڵاته‌يل ئه‌و وڵاته باوه‌ڕيان ئه‌وه‌سه ته‌نيا رێ وه 20% له شماره‌ى حاجيه‌يل هه‌ر ده‌وڵه‌تيگ بدريه‌ێد.
جى باسه، ئه‌و سه‌رچه‌وه‌يله ئاماژه وه‌يه‌يش كردنه ك بڕيگ له وه‌رپرسه‌يل سعودى هيمان فشار ئه‌يه‌رنه كار له‌وه‌ر خاتر هه‌ڵوه‌شاننه‌وه‌ى وه‌رز ئمساڵ حه‌جكردن ك پيشبينى ئه‌كريه‌ێد له كووتايه‌يل مانگ يۆليۆ ده‌س وه‌پى بكريه‌ێد.