شەفەق نیوز - کیێڤ / مۆسکۆ

دەسەڵاتەیل ئۆکرانی و رووسی، ئمڕوو یەکشەممە، خەوەردان لە کەفتن کوشیان و زەخمداری وە مدوو پەلامارەیل ئاسمانی و  گورزەیل وە فڕۆکە بیفڕۆکەوانەیل کە هەردگ ناوچەی کیێڤ و مۆسکۆ و دەورگردیان لە شەو گوزەشتە کردنە ئامانج.

لە ئۆکرانیا، وەرپرسەیل ناوخۆیی خەوەر دان لە کوشیان سێ کەس، کە دوو مناڵ لەناویانە، دۊای پەلاماریگ رووسی کە ناوچەی کیێڤ کردە ئامانج.

 سەرۆک وەڕێوەبەرایەتی سەربازی ئەرا شار کیێڤ، تەیمور تکاتشینکۆ، وت کە پەلامارەگە رەسیە ناوچەی "فاستیڤ" و بۊە مدوو کوشیان ژنیگ و دوو مناڵ، لە شان رەسانن زەرەد وە شمارەیگ لە ماڵەیل و ماشینیگ.

 رووژنامەی "کیێڤ ئیندپێندێنت" لە زوان پولیس نیشتمانی ئۆکرانی وت کە قوربانییەیل بریتین لە ژنیگ و کوڕەگەی کە تەمەنی دوو ساڵە، وەگەرد دۊتیگ مناڵ کە تەمەنی سێ ساڵە، و دیاری کرد کە هیمان دیار نییە ئایا ئی دۊت مناڵە لە ئەندامەیل خود خیزانەگەس یا نە.

 لە وەرانوەر یەیش، مۆسکزی پایتەخت رووسیا و دەورگردی رۊوەڕۊ پەلاماریگ فراوان وە فڕۆکە بیفڕۆکەوانەیل ئۆکرانی بۊ، کە بۊە مدوو کوشیان دوو کەس و زەخمداربۊن شەش کەس ترەک، کە دوو مناڵ لەناویانە.

 وەرپرس مقاطعەی مۆسکۆ ئەندرێ ڤۆرۆبیۆڤ، و سەرۆک شارەوانی پایتەخت سێرگی سۆبیانین، دووپات کردن کە وەرگرییە ئاسمانییەیل دەیان فڕۆکەی بیفڕۆکەوان رمانن مەوقەی نزیکەوبۊنیان لە پایتەخت و ناوچە هاوسایەیل.و میدیایەیل راگەیانن رووسی خەوەر دان لە کوشیان پیاویگ وەساڵاچگ لە شار "ئۆریخۆڤۆ-زویێڤۆ" و ژنیگ لە شار "سۆڤینۆ" وە مدوو پەلامارەگە، لە شان هیزگردن ئاگر لە کۆمەڵگەیگ ئەرا ئەممارەیل لە شار سۆڤینۆ، و گڕگردن ئاگر لە بان بیناییگ نیشتەجیبۊن 21 قات  لە شار "رامینسکۆی"، ئەوەگ هەوەجە وە چووڵکردن نزیکەی 400 کەس و زەرەدمەنبۊن 20 ماشین کرد.

هەمیش پارچە پەراشەیل زەرەد رەسانن وە دامەزراوەیگ لەناو پاڵاوگەیگ نەفت لە مۆسکۆ بی رۊداین زەخمداربۊن گیانی لەتی، لە شان زەرەدەیلیگ کە رەسینە ماڵەیل و بینایەیل نیشتەجیبۊن لە ناوچەیل رامینسکۆی، و کۆلۆمنا، و یەگۆریێڤسک، و لینینسکۆی، و لیتکارینۆ، و ئیسترا، و ڤۆسکریسینسک.