شەفەق نیوز/ وەرپرسەیلیگ لە ویلایەت بنسلفانيای ئەمریکا، خەوەردان کە پیاییگ چگە ناو یەکەی چەودیاریکردن هویرد، و فەرمانبەرەیل دەسوەسەر کرد، وەرجەیەگ وەدەس پولیس بکوشیەێد، ئەوەیش دویەکە شەممە، کە هەمیش یەک پولیس وە تەقەکردن کوشیا.

تيم باركەر، بانگەشەکار گشتی ناوچەی یۆرک، وت: پیاییگ چگە ناو خەسەخانەی  "يو بی ئەم سی ميموريال" کەفیگ وەدەسیەو بویە، کە دەوانچە و کەلبچەی پلاستیک لەناوی بویە.

ئەو کابرا چگەسە ناو بەش چەودیاریکردن هویرد و دەسکردە تەقەکردن، و سێ فەرمانبەر خەسەخانەگە زەخمدار کرد، یەکیگیان پزشکە، و یەکیگ پاکەوکەرە، وەگەرد خانمیگ پەرستار.

پیاییگ لە پولیس لەناو تەقەکردن گیانی لەدەسدا، و دوو کەس ترەکیش زەخمدار بوین، وەرجە کوشتن ئەو کابرای چەکدارە.

ناسنامەی ئەو پولیسە دیاری کریا، کە لە ئەنجام تەقەکردن لەناو خەسەخانەگە کوشیا، وەناو ئەندرۆ دوراتی، لە پولیس ناوچەی وێست یۆرک.

ئەو پولیسە وەڵام هاناڕەسین داگە، وەگورەی بڵاوکردن وەڕیەوبەرایەتی پولیس لەبان فەیسبووک.

 شون ماوك، وەڕیەوبەر ناوچەی وێست یۆرک، ئەرا ئاژانس ئەسوشيتد پرێس وت: " دڵ گشتمان شکیاس و خەفەتباریمن ئەرا لەدەسدانی".

وەرپرسەیل خەسەخانەگە لە یۆرک وتن: چەکدارەگەیش کوشیا، وەلێ هویچ بیماریگ تویش نەهات.

سوزان مانکۆ، خانمە جیگر سەرۆک پەیوەندییەیل گشتی لە خەسەخانەگە لە بەیانامەیگ لەبان سایت ئەلیکترۆنی وت: هیزەیل ئەمنی هانە شوینەگە و کارەگە وەڕیەو بەن.