شەفەق نیوز/ ئاژانس "سپۆتنیک" رووسی، ئمڕوو شەممە، خەوەردا لە کوشیان و زەخمداری ٣٥ کەس وە تەقینەوەیگ لەناوچەی "بول سوختە" لە کابوڵ پایتەخت ئەفغانستان.   

ئاژانسەگە لە زوان سەرچەوەیلیگ ناوخوەیی وت: ١٣ کەس کوشیان و ٢٢ کەسیش زەخمدار بوینە، بەشیگیان ئەرا خەسخانەی فیردەوس بریان، و بەشیگیان وە ماشین فریاکەفتن و پۆلیس ئەرا کابوڵ بڕیان.   

پۆلیس ئەفغانستان، دویەکە جمعە، کوشیان ٨ مەدەنی و زەخمداری ١٨ کەس لەلای کەمەو راگەیان زوە تەقینەوەی گەورەیگ لە خوەرئاوای کابوڵ پایتەخت.   

خالد بەدران قسەکەر پۆلیس ئەفغانستان وت: تەقینەوەگە لەبان گردەوبوینیگ ئەرا شیعە بوی، ک لەی رووژەیل ساڵیاد عاشوورا کەن، ودیاری کرد ک تەقینەوەگە لەناوچەیگ پڕ لە مەردم بوی لە پایتەخت، و بویە هووکار زەرەدەیل فرەیگ لە گیان وروی ماڵەیل وئەو ماشینەیلە ک لە ناوچەگە بوین.  

وەرجەیە، ریخریاگ داعش خوەی کەدە خاوەن ئەو تەقینەوە، و هەڕەشەی پەلامارداین دەسەیل شیعە دا ک لەی رووژەیل بانانە دەرچن.