شەفەق نیوز/ نزیکەی ١٨ کەس، ئمڕوو پەنجشەممە،  دۊای تەقینەوەیگ ک بۊە هووکار رمیان بینایگ نیشتەجیبۊن لە شار ربات کەریم لە باشوور خوەرئاوای تەهران کوشیا و زەخمداری بۊ.

شاهین فەتحی وەڕەوبەر مانگ سوور لە پارێزگای تەهران ئەرا رووژنامەوانی وت: شمارەی کوشیایل تەقینەوەی ربات کەریم لە ٥ تا ٩ کەسە، و شمارەی ئەو کەسەیلە ک وەزەخمداری لە ژیر رمیایەگە دراوریانە رەسێدە ٩ کەس.   

فەتحی وتیش: هیمان مینەکردن و وەشکین وەشۊن کەسەیلیگ لە ژیر رمیایەگە وەردەوامە.  

وەرپرسە ئیرانیەگە وتیش: وەداخەو تا ئیسە شمارەی راسی ئەو کەسەیلە ک لە مەوقەی تەقینەوەگە لەناو بیناگە بۊنە وەدەس نەکەفتیە.