شەفەق نیوز- کابول

لای کەم سێ کەس لە پەلامارەیلیگ ئاسمانی پاکستانی لەبان باکوور خوەرهەڵات ئەفغانستان کوشیان، ئمڕوو دووشەممە، وەپەی ئەوەگ وەرپرسەیل ئەفغانی خەوەر دان، ئەوەگ هەڕەشەی ئاڵووزی لە ناوەین هەردگ هاوساگە دەێد دۊای نزیکەی سێ مانگ لە ئارامییگ ریژەیی.

ئی پەلامارەیل ئاسمانییە دۊای چەن رووژیگ لە پەلاماریگ لەبان دامەزراوەیگ پولیس لە باکوور خوەرئاوای پاکستان هات کە بۊە مدوو کوشیان 16 کەس لەلای کەمەو.

 حەمەدلڵڵا فیترەت جیگر قسەکەر تاڵیبان لە بڵاوکریاییگ لەبان ئیکس وت کە لای کەم یەک ماڵ لەی پەلامارەیلە لە هەرێم کونار کەفتەسە وەر ئامانج، ئەوەگ بۊسە مدوو کوشیان سێ ئەندام لە یەک خیزان و زەخمداربۊن چوار کەس ترەک.

وتیش "لە وەڕێوەبەرایەتی بەرمەل لە هەرێم پەکتیکا، دوو شوین کەفتنەسە وەر پەلامار کە بۊە مدوو رمانن دوکانیگ و ماڵیگ چووڵ، بێ ئەوەگ هیچ خەوەریگ لە رۊداین زەرەدەیل گیانی بڕەسێد".

 سوپای پاکستان دەسوەجێ وەڵام داواکارییگ ئەرا قسەکردن لەبانی نەیا.

 ئەفغانستان لە یۆلیۆ/ تەموز فڕۆکەی بیفڕۆکەوان لە دژ پاکستان وەشانۊد، و ئیسلام ئاباد وت کە هیزەیلی ریگری لەلی کردنە و خستنەسەی خوار.

 پەیوەندییەیل ناوەین هەردگ هاوپەیمانە وەرینەگە وە ئاڵووزی مەننەسەو لە شوبات/ فێبرواریەو، وەختێگ هەردگ لایەن خەراوترین جەنگ لە ناوەینیان لە ماوەی ساڵەیلیگ رۊ دا.

 ئی ململانێیە زوور خەێدە بان چالاکی تونڕەوەیل لە پاکستان، کە ئیسلام ئاباد کابول تومەتبار دەێدە وە میوانداری چەکدارەیلیگ کە پەلامارەیلیگ لەڕی سنوورەیلەو لە خاکەیل ئەفغانیەو کەن.

 حکومەت تاڵیبان لە ئەفغانستان ئی تومەتەیلە رەت کەێد و ئۊشێد کە تونڕەوی کیشەیگ ناوخۆییە لە پاکستان.

 گەنترین رۊداو تاکەکەسی لە ئازار/ مارس رۊ دا، وەختێگ فرەتر لە 400 کەس لە پەلاماریگ ئاسمانی پاکستانی لەبان کابول کوشیان، کە تاڵیبان ئەفغانی وت کە سەنتەریگ ئەرا شایستەکردن ئالوودەبۊیەیل مادە هوشبەرەیل کردیەسە ئامانج.

 ئیسلام ئاباد یە رەت کرد، و وت کە "وە وردی دامەزراوەیل سەربازی و ژیرخانیگ ئەرا پشتگیریکردن تیرۆریستەیل کردیەسە ئامانج".

 داتایەیل پەیمانگای ناودەوڵەتی ئەرا خوەنستنەیل ستراتیژی کە بارەگای لە لەندەنە دیاری کرد کە پاکستان هیزیگ ئاسمانی گەورا دیرێد کە 422 فڕۆکەی جەنگی و فرەتر لە 260 فڕۆکەی هێلیکۆپتەر لەخوەی گرێد.

ئەفغانستان فڕۆکەی جەنگی نەیرێد، وەلی ناسریاگە کە لای کەمەو شەش فڕۆکە و 23 فڕۆکەی هێلیکۆپتەر و فڕۆکەی بیفڕۆکەوان دیرێد کە وەرجەتر لە جەنگ وەرد پاکستان وەکار هاتیە.