شەفەق نیوز - واشنتۆن
رووژنامەی "واشنتۆن پۆست"، رووژ جمعە، ئاشکرای وردەکارییەیل ئەو نامە کرد کە جەی دی ڤانس جیگر سەرۆک ئەمریکی رەسانیەسەی ئەرا سەرۆک ئەنجوومەن ئاسایش نەتەوەیی ئیرانی موحسن رەزائی.
وەرپرسیگ ئەمریکی، ئەرا رووژنامەگە وت کە "نامەگەی ڤانس رووشنایی خستیەسە بان دووپاتکردن لەپیشینەیی بەرژەوەنی نیشتمانی چ ئەرا ئەمریکا بوود یا ئەرا ئیران لە دانوسەنینەیل"، وە دیاریکردن ئەوە کە "ڤانس دووپات کردگە کە بەرژەوەنی بنەڕەتی ئەمریکی ها لە مسۆگەرکردن وەدەسنەهاوردن چەک ئەتۆمی لەلایەن ئیرانەو".
وتیش: "ئیدارەی ترەمپ رەزائی وە تەنیا کەسیگ دانەێد کە توانای دروسکردن سازانیگ دیرێد لەباوەت دانوسەنین"، وە دەسنشانکردن ئەرا ئەوە کە "کۆشک چەرمگ دوینێد کە دەرفەتەیل رەسین وە یەکلاییکردنیگ وەرد ئیران شایەت وەرەو کەمەوبۊن بچن".
وەرپرسە ئەمریکییەگە دیاری کردەو کە ڤانس بەرژەوەنی ئیران وە ئەوە باس کردگە کە خوەی دوینێدەو لە دووارە دروسکردن ئابوورییەگەی کە جەنگەیل و سزایەیل شەکەتی کردنە، و مقەیەتیکردن سەروەری نیشتمانییەگەی، و وتیش کە ڤانس جەخت کردگە لەبان "هەوەجەیی ئەوە کە ئیران نۊنەرەیلیگ کل بکەێد کە دەسەڵات تەواو داشتوون ئەرا باسکردن باوەتە ئەتۆمییەیل".
رووژنامەگە دەسنشان ئەرا ئەوە کرد کە گامەگەی ڤانس رەنگدانەوەی مەزەنەی ئیدارەی ترەمپە وە ئەوە کە رەزائی نۊنەرایەتی خاڵ پەیوەندی بنەڕەتی کەێد لە تەهران، و ئەو تەنیا کەسیگە کە توانای دروسکردن سازانیگ دیرێد لەبان رێککەفتنیگ کە ئامانجی ووسانن بەرنامە ئەتۆمییەگەس، وە دیاریکردن ئەوە کە زەرپرسەیل هەواڵگری ئەمریکی بڕوا دیرن کە رەزائی لە پەیوەندی رێکوپێکە وەرد ریبەر باڵا موجتەبا خامەنەئی، و ئەوان لە ماوەی چەن رووژ کەم گوزەشتە پەیوەندی ئەنجام دانە، واتە لە وەخت وەرگردن نامەگەی ڤانسەو.
وەرپرسە ئەمریکییەگە فتراق خستە بان ئەوە کە لە ئەگەر بەسانن دیداریگ، لە ناوەین ڤانس و رەزائی ئەوە وەرجە گشتی لە ئیستەنبوڵ تورکی یا دەوحەی قەتەری بوود.
لە لای خوەیەو، وەپەی رووژنامەگە ترەمپ ئارەزوو خوەی نیشان داگە لە "تەواوکردن ئەرکەگە" لەوەگ پەیوەندی وە ئیران دیرێد، لە وەختیگ کە وەزارەت جەنگ ئەمریکی "پێنتاگۆن" کار کەێد لەبان وەهیزکردن بویین هێزەیلی لە ناوچەگە، وەلێ وەرد ئەوەیش، دیارە کە ترەمپ و ڤانس رەسین وە رێککەفتنیگ ئاشتیانە پەسەنتر کەن لە شوین نووەوبۊن ململانێ.
رووژنامەگە دووپات کرد کە نامەگەی ڤانس پرسیاریگ راستەوخۆ خەێدە وەردەم رەزائی و هاوڕێیەیلی لە سەرکردایەتی ئیرانی کە ناوەڕۆکەگەی ئەوەسە: ئایا ئەوان ئامادەن ئەرا یەکلاییکردن ناکۆکییە ناوخۆییەیل و باسکردن چەسپانن کۆتوبەندەیل ناچارکەر لەبان بەرنامە ئەتۆمییەگەیان.
دیاری کرد کە یە لە وەختیگ تیەێد کە ئیسرائیل و ئەمریکا وە ئامادە دیارن ئەرا دەسوەپیکردن کار سەربازی، وە دەسنشانکردن ئەرا ئەوە کە دەرکردن بڕیارەیل لە تەهران پرۆسەیگ خاوە، وەلێ شایەت لە وەرانوەر سەرکردەیلی تەنیا وەختیگ کەم مەنوید.
لەی باوەتەو ئاژانس خەوەری "تەسنیم" ئیرانی، ئیوارەی دۊکە پەنجشەممە، وت کە تەهران نامەیگ لە جیگر سەرۆک ئەمریکی جەی دی ڤانس وەرگردگە "و وەڵامی نەیاگەسەو".
وتیش کە ئیران دەسگردگە وە هەوەجەیی جیوەجیکردن هەفت مەرجەگەی لەلایەن وڵاتەیل یەکگرتگەو، وە دووپاتکردن لەبان ئەوە کە "هەر هەڵوێستیگ پێچەوانەی ئی چوارچیوە بوود قەبووڵکریاگ نییە".