شەفەق نیوز/ راپۆرتیگ وەلایەن رووژنامەی دەیلی نۆرت کۆریا باس گورانی نوویگ وە باڵای کیم جۆنگ ئۆن سەرۆک کۆریای باکوور کەێد، کە هاوڵاتیەیل لە ژیروەژیرەو بیزار لەی گورانیە بوینە، چوینکە هەر وەبانیان دووارەو کریەێد، و فرەیش لە راسی ژیان خەڵکەگەو دویرە.
رووژنامەگە لە سەرچەوەیگ کۆریای باکوور وت: ناو گورانیەگە (باوگ رویخوەش)ە، هەر رووژیگ چەن جاریگ لەبان تەلەفزیۆن دەرچوود.
سەرچەوەگە دیاری کرد کە هاوڵاتیەیل واتا چەنیگ ئی گورانیە لە ژیان تاڵیان دویرە.
وەگورەی رووژنامەگە، ئەو گورانیە لە ١٦ی نیسان لە ئاهەنگیگ نمایش کریا، و واژەیلی باس باوەڕی گەل کۆریای باکوور وە ریبەر کیم کەن.
سەرچەوەگە وتیش: راسیەگە لە قسەیل گورانیەگە دویرە، کە مەردم زیان فرەیگ دیرن و فرە جار خواردن ودەسیان نیەکەفێد.
وتیش: بەدخوەراکی فرە لە وڵاتەگە زاڵەو بویە، و مناڵەیل پویل نەیرن بچنە مەکتەو، لە وەختیگ گورانیەگە باس خوەشهاڵی گشت مەردم کۆریای باکوور کەێد.