شەفەق نیوز - واشنتۆن

ویلایەتە یەکگرتگەیل ئەمریکی، ئمڕوو جمعە، پەیوەندیکردن یەکێتی ئەوروپا وە شيوەیگ فەرمی ئەرا هەڵمەت "دەرکریاگ ئابووری" (Operation Economic Outcast) کە واشنتۆن دژ وە ئیران سەرکردایەتیی کەێد راگەیان، لە گامیگ کە ئامانج لەلی فراوانکردن مەودای فشارە داراییەیل و گووشەگیری ئابووری ناودەوڵەتییە لەبان تاران.

وەزیر گەنجینەی ئەمریکی سکۆت بێسنت لە بەیاننامەیگ فەرمی وت، کە واشنتۆن پیشوازی لە هەڵوێست ئەوروپی هازدار و زۊینە کەێد ئەرا خەسەوکردن فشار ئابووری لەبان تاران، دووپات کرد کە "ویلایەتە یەکگرتگەیل وە تونی وەگەرد هاوپەیمانەیلی وسێد ئەرا مسۆگەرکردن ریگریکردن لە رژیم ئیرانی لە گیرهاوردن سیستم دارایی جەهانی ئەرا پۊلدارکردن ئامانجە ئەتۆمییەیلی، و بەرنامە موشەکییەیلی، و بریکارەیلی لە ناوچەگە".

بێسنت هەمیش وت کە "پەیام ناودەوڵەتی ئەرا تاران ئاشکرا بۊە، و ناوەرۆکەی ئەوەسە کە هاوبەشە ناودەوڵەتییەیل نیەوسن تا بڕین گشت دەمارەیل ژیان ئابووری و دارایی کە مەننە ئەرا رژیمەگە".

لەلای خوەیەو، یەکێتی ئەوروپا ئامادەیی خوەی ئەرا پشتگیریکردن چەسپانن فشارەیل ئابووری زیاتر لە چوارچیوەی پرۆسەی ئەمریکی دووپات کرد، وەگەرد دووپاتکردن لە خود وەخت لەبان هەوەجەی وەردەوامبۊن تەقەلا دیپلۆماسییەیل و کەمەوکردنە ئاڵووزی هەرێمی و مسۆگەرکردن ئازادی دەریاوانی و بیوەیی رەدبوین لەڕی گەروو هورمز.

 ئەوروپا داوا لە تاران کرد هەردوگ بەرنامە ئەتۆمی و بالیستییی بووسنێد، و وەسانن ئەو چالاکییەیلە کە ئارامی لە خوەرەڵات ناوڕاس و ئەوروپا شیونن.