شەفەق نیوز - واشنتۆن
رووژنامەی واشنتۆن پۆست، ئمڕوو شەممە، ئاشکرا کرد کە مەزەنەیل دەرچگ لە فەرماندەیی ناوەندی ئەمریکی نیشان دەن کە جەنگ وەرد ئیران نزیکەی 43.6 ملیار دۆلار خەرجی بۊە تا سەرەتایەیل مانگ ئەیلول/ سێپتەمبەر ئیسە.
وەپەی بەڵگەنامەیگ کە رووژنامەگە چەوی کەفتیەسە پی، بڕە پۊلەگە نزیکەی 28 ملیار دۆلار لەخوەی گرێد ئەرا قەرەبووکردن ئەو تەقەمەنییەیلە کە وەکار هاوریانە ماوەی ئەو جەنگە کە لە 28 شوبات/ فێبرواری دەس وەپی کرد، لە شان فرەتر لە 4.3 ملیار دۆلار چۊ بڕە پۊل کەرەستەیلیگ کە گوم بۊنە یا زەرەد وەپیان رەسیە.
وەگورەی بەڵگەنامەگە، هیزەیل ئاسمانی وە فرەتر لە 6.6 ملیار دۆلار کەفتنە وەرجەی خەرجکردن کارپیکردن، و وەدۊای ئەوەیش هیزەیل دەریایی وە نزیکەی 2.2 ملیار دۆلار، و دۊاتر هیزەیل هشکانی وە نزیکەی 1.6 ملیار دۆلار هاتن.
ئی شمارە وە فرە بەرزتر لەو مەزەنەیلە هەژمار کریەێد کە ئیدارەی سەرۆک دۆناڵد ترەمپ وەرجەتر خەوەر لەلیان داۊد، و هەمیش خەرجەیل ئاییندەی چەوەڕیکریاگ لەخوەی نییەگرێد ئەرا دووارە ئاوەدانکردن دامەزراوە سەربازییە ئەمریکییەیل زەرەدمەن یا رمیان لە دەیشت.
لە مەزەنەیگ جیا، نویسینگەی بودجە لە کۆنگرێس، کە دەسەیگ بێ لایەنە، وت کە جەنگەگە تویش نزیکەی 38 ملیار دۆلار کردیە تا تەموز/ یۆلیۆ، لە شان ناوەین دوو ملیار تا سێ ملیار دۆلار مانگانە، وەپەی تونی جەنگەگە.
وەزارەت جەنگ ئەمریکی وەرجەتر مەزەنە کرد کە خەرج جەنگەگە بڕەسێدە نزیکەی 37.5 ملیار دۆلار تا کووتایی ئەیلول/ سێپتەمبەر، بی هەژمارکردن ئەو زەرەدەیل گەورا کە رەسینە بنکە ئەمریکییە ئامانجگریاگەیل لە ناوچەگە.
لەی چوارچیوە، واشنتۆن پۆست دیاری کرد، کە شمارەی کوشیان لە ناوەین هیزەیل ئەمریکی ماوەی جەنگەگە فرەترە لەو شمارەیلە کە وە فەرمی خەوەر لەلیان دریاس، و لە زوان وەرپرسەیلەو وت کە لای کەم 22 سەرباز ئەمریکی گیان لەدەس دانە، وە زیایبۊن چوار کەس لەبان ئەوەگ لەناو بنکەی زانیارییەیل گشتی پێنتاگۆن خریانەسە روی.
رووژنامەگە دیاری کرد کە وەرپرسیگ ترەک وت کە بڕیگ لەو مەرگەیل بی خەوەرە وە راسەوخۆ پەیوەندی وە ململانێیەگەو نەیرین، وەلی سەربازەیل ئەمریکی لەخوەی گرد کە ماوەی وەردەوامبۊن ئۆپەراسیۆنە جەنگییەیل لە خوەرهەڵات ناوڕاس بۊنە.
لە لای خوەیەو، وەزیر جەنگ ئەمریکی پیت هێگسێس ئی زانیارییەیلە رەت کرد، و راپۆرتەگە لە بڵاوکریاییگ لەبان سەکوو "ئێکس" وە ئەوە نیشان دا کە "دروویگ تەواوە".