شەفەق نیوز- وەدۊاچگن

وارانەیلیگ فرە کە لەبان باشوور تایوان وارین، ئمڕوو دووشەممە، دەسەڵاتەیل ناچار کردن وە بەسانن مەکتەوەیل و دامەزراوە حکومییەیل لە شمارەیگ لە شار و ناوچەیل، لە وەختیگ رەوشە بەدەیل کەشوهەوا بۊنە مدوو شیویان جۊلەی کڕەیل ئاسن، هاوەخت وەگەرد ئامادەیی دوورگەگە ئەرا گەردەلۊلیگ کە مەزەنە کریەێد ئی هەفتە وەپی بڕەسێد.

 دەسەڵاتە ناوخۆییەیل لە هەردوگ شار کاوشیۆنگ و تاینان، کە شمارەی دانیشتگەیلیان لە چوار ملیۆن کەس زیاترە، وتن کە بڕیار دانە مەکتەوەیل و نویسینگەیل بوەسن، لە وەختیگ رێکارەیل ناوچەیل پینگتۆنگ و چیایی گردە خوەی، وەگەرد هەردوگ پارێزگای تایتۆنگ و هوالین کۊیەدار لە خوەرەڵات دوورگەگە، وەگورەی رۆیتەرز.

 ناوچەیل باشوور تایوان لە چەن رووژیگەو وارانەیل فرەیگ و لافاوەیل وەخوەیان دوینن لە ئەنجام وەردەوامبۊن کاریگەری سیستەمیگ پەستان کەشوهەوای نزم، لە وەختیگ حکومەت کاوشیۆنگ مەزەنە کرد کە بڕ گشتی وارانەیل لە پەنج رووژ ئاییندە لە 1.3 مەتر رەد بکەێد.

 دەسەی کڕەیل ئاسن هوشداری دا لە شیویایەیل ئەگەردایگ لە کڕ سەرەکی ئەرا کەناراو خوەرەڵات و قەتار وەرەوچگەیل لە کاوشیۆنگ و ئەرای و لە تایتۆنگ و ئەرای، وەگەرد هەڵوەشانن خزمەتگوزارییەیل قەتارە تونەیل.

 دەسەی کەشناسی ناوەندی وت کە گەردەلۊل "سودیل"، کە ئیسە وەرەو ناوچەی ئۆکیناوا لە باشوور یابان چوود، مەزەنە کریەێد رووژ جمعە لە باکوور تایوان رەد بوود وەرجە ئەوەگ وەرەو کەناراو خوەرەڵات چین بچوود.

لە وەرانوەر ئەوە، کۆمپانیای "تی ئێس ئیم سی"، گەوراترین کۆمپانیای جەهانی ئەرا پیشەسازی چیپە ئەلکترۆنییەیل ئەرا لایەنەیل ترەک، راگەیان کە گشت کارخانەیلی لە تایوان وە شیوەیگ ئاسایی کار کەن، دۊای تەواوکردن رێکارە رۆتینییەیل تایبەت وە ئامادەیی ئەرا وارانە رفتەیل.