شەفەق نیوز/ زیاتر لە هەزار کووچبەر، وەماوەی چەن ساعەتەیل کەم گوزەشتە لە رووژ یەکشەممە، چینە ناو ئیتالیا، لەوەختیگ سەدان کەستر ک کەشتەیل مرۆیی رزگاریان کردن، لەناو بەندەر پیشوازیکردن هانە چەوەڕی.  

کەشتیگ بازرگانی و پاسەوانەیل کناراوی، دویەکە شەممە، زیاتر لە ٦٠٠ کەس رزگار کردن، ک وەناو بەلەم راوکردن، وەرانوەر کالابریا لە باشوور ئیتالیا، تەقەلای رەدبوین لە دەریای ناوەڕاس دان، ئیجا رەسینە چەن بەندەریگ لە سەقەلیە.    

دەسەڵاتەیل هەمیش پەیای تەرم پەنج کووچبەر کردن، ک لە رەوشەیل نادیاریگ گیانیان لەدەسدانە. 

وەگورەی ریخریایلیگ نا حکومەتی و دەسەڵاتەیل ئیتالیا، نزیکەی ٥٢٢ کەس لە ئەفغانستان و پاکستان وسودان و ئەسیوپیا وسۆمال رەسینە دوورگەی لامبیدوزا، تایبەت لە شەو شەممە ویەکشەممە، وەناو پانزە بەلەم جیاجیا لە تونس وليبيا.  

وەگورەی میدیایل راگەیانن ئیتالی، ناوەند پیشوازیکردن لەی دوورگە ک نزیکترە لە ئەفریقا وەچەو ئیتالیا قەرەباڵغە، و ئیسە نزیکەی ١٢٠٠ کەس هاناوی، ک خوەی بەش ٢٥٠ تا ٣٠٠ کەس کەێد، وەگورەی ئاژانس "ئەنسا".