شەفەق نیوز/ پیاویگ عراقی لە ئەمریکا، ئمڕوو شەممە، کەفتە وەر رویداویگ کەلەمەدار لە شار دیترۆیت گەورەترین شارەیل لە ویلایەت میشیگن ئەمریکا.
ماڵپەڕ خەڵکەیل عراقی لە ویلایەتەگە لەبان فەیسبووک نویسان: عماد عیدانی لە تەمەن ٥٥ ساڵە، کەفتە وەر دزیان و دەسوەشنانن سەخت مەوقەی دەرچگنی لە دوکانیگ لە دیترۆیت.
وەگورەی پۆستەگە، عماد ئیسە کەفتیەسە ژیر چەودیاریکردن هویرد، و تەندروسیی ناجیگیرە.
کەناڵ چوارەم لە دیترۆیت وەشیوەیگ پەلە لە خەوەرەیل ئمڕوو وەگەرد پارچە ڤیدیۆیگ ئەو خەوەرە بڵاو کرد، ک کەسیگ رەنگ بوور وەدەس کەسیگ بەرزەو کەێد و وەشیوەیگ وەحشیانە دەێدەی یان زەوی.
کەناڵەگە وتیش: ئەو کابرا ک پەلاماریری دریاگە عراقیە وەناو عماد عیدانی.