شەفەق نیوز- واشنتۆن

وەزیر وزەی ئەمریکی کریس رایت، ئمڕوو چوارشەممە، وت کە دۊکە 18 مەلیۆن بەرمیل لە نەفت خاو و بەرهەمەیل پاڵاوتی لە گەرووی هورمز رەد بۊنە، لە وەختیگ ناوەنجی ماوەی 7 رووژ نزیکەی 11 مەلیۆن بەرمیل بۊە لە رووژیگ.

 رایت، لە دیداریگ وەگەرد توڕ "فۆکس بزنس" زیاتر وت، کە هەڵسەنگاندن زەرەدەیل لەبان کڕ لۊلەیل نەفت سعودی کە لە خوەرهەڵاتەو ئەرا خوەرئاوا دريژە کیشێد وەردەوامە، و کڕ لۊلەگە "نزیکەو" گلەو خوەێد ئەرا کارکردن.

 دووپات کرد کە زیایبۊن رەوانەی دابینکردنەیل لەڕی گەروو باب ئەلمەندەب سوودمەن بوود.

 وتیش کە ئیدارەی سەرۆک دۆناڵد ترەمپ هۊر لە کاراکردن یاسای بەرهەمهاوردن وەرگری کەێد ئەرا وەهازکردن توانای پاڵاوتن ئەمریکی، و دیاری کرد کە کۆمپانیایگ نەفت ئەمریکی ئمڕوو باس لە بەرهەمهاوردن لە ڤەنزوێلا کەێد.

 وەرجەتر لەی رووژە، سوپای پاسداران ئیرانی خەوەردا لە وەخوارخستن فڕۆکەیگ بیفڕۆکەوان دروسکریاگ ئەمریکی لە جۊر "ئێم کیو-9" ماوەی سەعاتەیل شەو لە ئاسمان دوڕگەی قشم کە کەفێدە ناو گەروو هورمز.

جی باسە کە سوپای پاسداران ئیرانی، دۊکە سێشەممە، خەوەردا کە 3 فڕۆکەی بیفڕۆکەوان لە جۊر "ئێم کیو-1" لەبان گەروو هورمز و دەورگردی وەخوار خستیە.

 کۆنترۆڵکردن لەبان گەرووەگە، کە رێڕەویگ رەدبۊنە ئەرا نزیکەی یەک لە پەنج نەفت جەهان، بۊسە خاڵ ناکۆکییگ سەرەکی لەناو ئەو گفتوگۆیەیلە کە ئامانج لەلیان کەمەوکردن ئاڵووزیە وەگەرد ئیران.

 وەگەرد پەککەفتن گفتوگۆیەیل کە تەقلا دەن بڕەسنە رێککەفتنیگ ئەرا دووارە وازکردن رێڕەو ئاوییەگە، سەرۆک دۆناڵد ترەمپ گلەو خوارد ئەرا پەستان ئابووری کە لە سزایەیل و گەمارۆی ئەمریکی خوەی نیشان دەێد.