شەفەق نیوز/ وەزارەت تەندروسی دەوڵەت کوێت، ئمڕوو چوارشەممە، راگەیان کە تا ئیسە ٤٣ کەس رەسینەسە خەسەخانەیل لەوەر زەخمداری و تاسیان لە ئەنجام ئاگر ناو بینایگ لە ناوچەی منقف، وەگەرد مردن چوار کەس.
وەزارەتەگە لە بەیاننامەیگ وت: زەخمدارەیل وەبان چەن خەسەخانەیل کوێت وەیجویرە بەشەو کریان: ٢١ زەخمدار لە خەسەخانەی عدان، و ٦ زەخمدار لە خەسەخانەی فروانیە، و یەک زەخمدار لە خەسەخانەی ئەمیری، و ١١ زەخمدار لە خەسەخانەی موبارەک، و ٤ زەخمدار لە خەسەخانەی جابر.
وەزارەتەگە وتیش: گشت تیمەیل پزشکی تەقەلای پیشکەشکردن خزمەت چەودیاریکردن ئەرا زەخمدارەیل دەن.
راپۆرتەیل رووژنامەوانی باس ئەوە کردن کە ئاگرەگە بویەسە مدوو کوشیان ٣٥ کەس لەلای کەمەو، وەگەرد دەیان زەخمدار.